呢一個月，唔係讀書、補習就係遊車河同聚會。遊車河近排近乎無做，聚會都係好間唔中先一次，都係黎緊星期六先會，所以呢個月都係讀書、補習、訓覺。
中化係五科之中最惡頂既科，咩中國傳統政治，真係讀到頭都爆。又咩親疏有別，咩咩性格，到做題目嗰陣好難應用到出黎，做極都係十七十八分，唉…
英用一如既往打天才波。近排心情好差，Listening 完全無心機做，好差…Practical Skills 因為以前 hea 做好低分，而家比返少少心機就反而做得比以前好。Reading Compo 都係維持舊水平…
數統教 Integration，Differentiation 做得好做 In 係易做好多，同埋有補習幫助（補習社教既 substitution rule 係快過書嗰個好多倍）。數統測驗而家都係頂龍扣一兩分單位分，算測得好，不過須知道呢科係半科，唔可以投入太多精力入去…
經濟我係算考得比較好，亦都係可以叫 hea 一 hea 既科。由第一課教到 Factor Market 啲 concept 都可以叫好清。不過近排開始教 Interest, Income & Wealth 真係好難（照理而家啲人係教緊 Price Searching，早人地成三課 =.=）…呢科野好數學又好會計，啲用詞似會計，算式（咩 perpetual income / perpetuity）就好數學（其實只係 summation of geometric sequence）。除咗計數之外，佢好多 concept 都好玄，好似嗰啲 『income is a series of events』 『interest is not a part of income,but the whole of income』，搞咗一大輪先明咩意思…總之好難。
歷史又係咁既樣，最無心機做 essay。歷史教完一二戰同俄國革命，啱啱又教完墨索里尼，而家教希特拉。極權主義只係細 topic，好少出，不過聽講讀熟晒的話可以唔洗再讀書…不過，讀到先算啦。
呢兩個禮拜真係 hea 過，每日頂龍讀半粒鐘。話咁快又星期四，又放假可以盡情咁 hea 㕸…
東涌
無打一個禮拜…打下最近既近況…
上個再上個禮拜六，I-Circle 死咗，去到尋日先至開返，總共死咗十一日…有賴 WChost 個新老闆，舊嗰個拆咗 WChost 既伺服器業務去 Geeks。啲人流少咗差唔多一半，真係有賴佢地良好既服務。今次完咗之後，除非有大改善，我好大機會都會用 TEAMagic 或者 Puff 租（定買？）既伺服器
freelance 方面，近排繼續同個 freelance 開工。尋日就真係完工，只係有啲少野未搞掂，不過嗰個客反而無時間，叫我 10/2 先交貨，whatever，每日整一個鐘叫改善一下，因為而家加落加落真係唔少錢。
學校方面，上個星期五同今個星期一就有運動會，全程除咗同同學吹水之後就係喺度練 pan 相。
學業方面，五科既成績都唔太滿意，要加緊努力溫啦，尤其係科 HISTORY，因為始終都係 AL，M&S 都係 AS Subject。見完老師派張野，理科會考 26 分去到高考只係得 18 分，真係好大壓力…我目標係高考 25 分…
享樂方面，尋日就買咗個模擬市民 3：頂級奢華組合，平到裂，$118，以前 $168，相等於個世界歷險記…啱啱裝好但未開始玩…佢張抽獎卡，得支水…
其他野方面，近排有人講下發現咗我部相機原來有一分鐘快門，喺欣澳玩咗張一分鐘快門既全景圖同埋光軌。至於尋日同今日，就喺度同車玩 pan 相…
呢個幾禮拜以黎既野，喺下低個 album 可以睇得晒～
今日就返學，陸陸續續都要派卷。
第一、二堂中化堂，首先個唔知乜野會就頒咗個學界最佳進步獎比我。差唔多啦。佢係 2008-2009 年既，應該係因為我學校成績同會考分好大出入先頒比我。
份野包咗個學習經驗書同埋一張吉野家既免費飯優惠券，極之實用，所以走咗去奧海城一期同朋友一齊食。
由於中化老師成日講廢話既關係，淨係派得份閱讀同實用文…閱讀出奇意料地高分，作文出奇意料地低分…
第三堂經濟，成堂喺度講 SQ，唉錯得好離譜，不過知道自己合格，唔知係 4、5、定 6 字頭。（以前我覺得 6 字頭好羞愧，而家 6 字頭己經好開心 =.= 中史仲慘，一百分滿分，平均分廿分，最高分五十七分 =.= 60 分已經攞 C）
第四堂 M&S，都係錯埋晒啲弱智低能野，IMPLICIT FUNCTION 無加 dy/dx…不過我 38/50 都全班第二…
第五堂 HIST 無派卷只係講 ANSWER PLAN 只係傾俄國革命同高鐵…人有唔同意見好正常，最緊要和而不同，互相尊重，雖然我同學唔少都質疑高鐵既成效，不過我都會抱住尊重既態度解釋。呢個係咁耐以黎我參與得最好既一場討論，說唔說服到人係其次，至少，認識到我呢班同學係我既榮幸。
今日考 ECON，A-Level 既 AL 卷，考足三粒鐘（Final 都好似已經六粒鐘…）。
第一次考咁耐，每一個鐘都望出面景觀小休一陣，一黎真係好累好攰，二黎我隻眼唔多舒服，要望啲綠色野調劑一下。
份卷真係有啲不滿，因為老師出咗啲唔係範圍既野。短題目我全部都識，只係一題有啲重要野無寫，好似「點解經濟學家唔會比 Law of Demand 有例外？」「因為無咗需求定律，所有經濟理論都會變咗套套邏輯，無解釋能力。」。
長題目，三題有一題 12 分既係不在「範圍」內的 Price Searching & Monopoly。佢一開頭唔知講咩「跨境火車有空位，而供應呢啲空位既 MC 係 0，所以跨境火車既價格應該要係 0，先可以將 consumer surplus 最大化。」呢句野同後尾既問題完全無關係，後尾又講餐廳、西隧：西隧既收費係用黎補貼 AVC AFC 定 MC，我仲奇怪點解 Price Taking 有啲咁既野，原來真係出啲 out-sy 題 :@
考完真係好攰。食完仙桃源就返圖書館溫咗四粒鐘 M&S，再去補 M&S。
話咁快，後日就返學，大後日就考 UE (B / Writing), UE (E / Practical Skills) 既卷啦。死期將到，而家就回想一下呢個假期做咗啲乜…
呢個聖誕假期，我只可以用一隻字黎形容，「迆」（hea）。
自聖誕假期 23 號開始，日日都係渾渾噩噩咁過。上網就上成幾粒鐘（都唔知點解可以上咁耐 =.=），一係出下街同朋友聚下影下相，無架啦。
由 19 號開始到而家，最短溫書時間係兩粒半鐘（除夕日），最長既係得嗰四個鐘（我要求平均係四個鐘），好唔足夠。
大後日就開始考試，UE – ECON – CL&C – HIST – M&S …. 太迆…
ECON 淨係喺度溫書，莫講 exercise 有無做，以前 exercise 啲 answer key 都無溫過
HIST 算啦，淨係溫咗 WWI 同 WWII (仲要係唔熟嗰隻），Russian Revolutions 連溫都未溫過，亞歷山大二世之後嗰個邊位仁兄都唔記得咗囉，唯一記得係 1917 尼古拉斯二世比人推翻囉…
M&S，微分、Log 係做得好好，初頭啲 P, C、exponential graph, binomial 完全唔識，仲有嗰個 application of D 做都未做過
聽日 last day，死梗囉…
