Bananasims Workshop

自製，畫咗總共五個鐘

啲字細隻到放大鏡先睇到…

有小學同學搵我出黎，所以今朝就同佢去沙田中央圖書館溫書。

前日去又一城買餸嗰陣已經見到路面下低漏水，估唔到而家爆埋出黎…

我同佢唯一一科有一齊讀既就係 ECON，所以就溫 ECON…今日就溫 Cost & Rent，其中 historical cost 溫咗好耐。A-Level 都無得背答案，佢就喺度背，又要次次唔記得句 『Bygones are Bygones』，好煩 :@ 溫完 Cost & Rent，仲剩 Production 同埋 Price-Taking 未溫得熟，今日希望溫完，今晚就溫 Maths & Stats 既 Application of Differentiation 同埋 Binomial。

溫咗個幾鐘，走咗去 IKEA 買餐具。行到一半去嗰間 IKEA 餐廳食飯，我食咗個瑞典牛肉丸，佢就食咩蕃茄海鮮意粉。我買 10 粒裝 $19，佢就買咗 $26，加多個 $7 任斟。瑞典牛肉丸實際成 16 粒，本來諗住食少啲空肚食爆谷，算啦…佢嗰個都幾大碟。

最後行埋自助區就走到去小食部。佢就仲食得落個爆谷，我就幫我家姐買個熱狗。

行落去沙田站坐車返屋企。架東鐵好多人（未到荃灣綫嗰種程度），啲熱狗啲醬又隨地心吸力流晒去個紙袋到，仲要喺個咁迫既環境「葉」，真係好核突。

最後返到屋企。

（因為拎住個熱狗搞到乜相都影唔到 :@）

尋日喺美孚補完習，就喺美孚新邨 5 期搵 Jacky 食飯。好耐無見，行到去 6 期麥記諗住食，點知發現貴到死…過去對面 4 期美孚廣場，都係咁貴，所以最後去 8 期（近吉利徑）嗰間美心 MX 食。

食完佢走去石硤尾，反正順路所以一齊。喺石硤尾留咗陣。

好彩時間啱啱好，搭去樂富坐免費穿梭巴士。

—–

來自英國 Brighton 既 Kenneth 返咗黎。本來諗住前日去尖東，不過問完佢話唔得閒所以尋日先去。

尋日補完習之後，喺屋企溫咗陣書就去佢屋企。搭免費車 > 樂富小巴 > 順緻苑。玩咗陣無聊野就搭小巴去彩虹搭去紅磡。喺紅磡慢慢行過去尖東。本來又係想食美心 MX，不過見到 Wow! Burger 就入去食。Wow! Burger 食咗$39，啲服務同荃灣爭好遠，不過真係好好食。

然之後走去半島中心 book 枱。

最後就喺尖東同出黎海皮影燈飾，影咗三個幾鐘。我完全未學過影燈飾，所以影得幾差。

試咗張 HDR

夜晚梳士巴利道同麼地道好少車，啲低速快門無一張 ok

11 月 14 日去咗大西北，遊西鐵、輕鐵同鐵巴，順便陪朋友試下新舖頭。

晨咁早九點就搭觀塘綫同荃灣綫去尖沙咀買電子產品，順便喺嗰半個鐘內遊一遊尖沙咀啲出口，再轉西鐵。

尖東啲出口一早背到熟晒，尖沙咀嗰啲A B C D 喺邊我都唔知 :$ 每個出口行過下咁，A2 出口條扶手電梯個燈箱放得好型。

去南昌買全日通。以前一向美孚買，貪佢個客務中心近，唔洗喺天安門廣場行，仲諗住車費平啲—一直以黎以為九龍塘—美孚既車費平過九龍塘—南昌，事實唔係，美孚 $2.8、南昌 $2.3。南昌同奧運一樣 $2.3，荔景、美孚、柯士甸就收 $2.8，搭多一個站反而平啲 :S 同柴灣去荃灣平過柴灣去旺角東大同小異。

入大西北，又係元朗落。諗住行個弱智 H 出口，不過附近個出閘機食票。個職員同我講話嗰部機個閘壞咗，好多人都出唔到閘。咁又唔封咗部機 =.=…. 去完個 H 出口再行去輕鐵站搭。因為以為最高係最早開出既車，所以上咗 614，點知睇住隔離啲線咁快走，所以先知睇錯野，轉坐第條線。今次遊希望係續個輕鐵站留影，自己都有個深刻印象。

大棠道、康樂路、豐年路、水邊圍四個站去過唔知 N 咁多次，所以第一個站係屏山。落車，過對面月台嗰陣見到有專車，原來就係載住港鐵職員換錢箱。身為九龍人既我當然覺得新奇，不過屯天元人就司空見慣啦。

然之後慢慢坐…塘坊村、洪水橋、鍾屋村、泥圍、藍地，通通影晒。個藍地站真係恐怖，個月台隔離個石地勁多煙頭。過完堆輕鐵站，去到兆康，再搭輕鐵返天水圍轉西鐵去美孚補習。

補完習去錦上路搵朋友，再去荃灣食野。今次食 Wow! Burger，喺荃興徑。喺荃灣西站慢慢行過去食。間舖頭幾細間，不過咁既天氣，環境尚算不俗。我叫芝士豬柳漢堡餐 $28，朋友叫芝士牛肉漢堡餐 $35（餐包野飲同薯條，野飲加大咗）。個包真係幾好食，相比麥記，個份量大少少，價錢又平少少。啲薯條先好食，樣又似電話線，味道類似 KFC 既薯塊，不過仲好食。

食完返大西北。本來諗住去濕地公園，點知都就到閂門時間，所以改去流浮山。去天水圍站坐 K65。初頭行咗去總站，睇下告示先知走咗去屏廈路。等咗差唔多十五分鐘先至有車。架車好迫，沙甸魚，有位坐都好唔舒服。喺流浮山路站站停。沿途唔會見到任何鄉村風光，反而見到既只係一堆貨櫃場。

去到流浮山，本來充滿期望，點知個迴旋處週圍都只係見到爛路、爛車、貨櫃車。呢啲咁既都算人地所講既「美食天堂」？算，行入去大街。所謂既大街其實只係混亂既舖頭中一條小路，迫之餘又無水鄉既感覺，只係覺得行緊街市。出到去，嘩！原來一個廢墟就叫流浮山？出黎只係見到一堆 rotten structure，一係就見到成堆蠔瞉。見到下低仲嘔心，下低條渠又多污水又多垃圾，睇見就作嘔。條渠仲要係流入后海灣，睇你仲敢唔敢食流浮山啲海鮮？去完海邊我對流浮山既海鮮大失信心，朋友仲話食 $12 炸蠔，算啦，食炸重金屬就有份。

嗱嗱臨搵返架 K65 返天水圍站。搭到去天水圍站轉去天恆邨既天影路特快綫 K76。架巴士喺屏廈路出黎等好耐紅綠燈，不過一上天影路，過一陣（我估七分鐘）就到天恆邨，同喺新世紀坐 K5 機場快綫巴士去九龍站一模一樣。

去到天恆又唔想坐輕鐵，所以又坐 K73 去元朗西。條線同 A73 喺天水圍既走線好似差唔多。好快就去到朗屏，再去到大馬路。我係過咗元朗廣場先至到咗元朗西，所以又要喺安寧路到行去康樂路搭輕鐵去元朗。

去到元朗轉西鐵去兆康，出條橋影低速快門。無腳架，都係放喺個石屎欄杆到。影咗好多張得嗰幾張滿意…無腳架係咁 =.=

最後坐西鐵返屋企。途中，喺朗屏有個人訓著覺，而個電話係咁響。朗屏響到去南昌落車都仲響緊…初頭個個人都望住佢，不過去到錦上路荃灣西啲人已經當呢個音樂唔存在，繼續做自己野…

另外，貼下我喺 iPhoto set 咗我影過既地方 :$

今日開始測驗週，不過自 Form 5 已經對測驗週麻目，因為日日都是測驗天。

又如常行落九龍塘站。我想講棟創新中心好耐…呢棟野既英文名叫 InnoCentre，咁睇係無問題。不過轉做全大楷，INNOCENTRE，我初頭喺達之路坐私家車仲以為係 innocent…

有邊個仲記得以前九鐵時代個核突樣？

成個站粉紅色、核突藍色牌、九鐵 logo、白色石屎、無欄杆（logo 上面嗰度）、黃色通風樓、焗漆版舖頭…而家換晒啲表面嘢…好想佢快快趣趣拆晒成個站佢換新野。

非常「有幸」地返學放學坐中八架千九其中一架。一向都唔鐘意千九，MLR 靚仔好多。換咗貼紙好得多，不過都係好樣衰。

無無聊聊走去A 出口走，喺轉乘通道見到呢個九鐵牌。佢令我諗返起以前 B 出口一落黎轉左搭東鐵、轉右搭地鐵。以前九鐵個牌落樓梯嗰陣係睇唔到，仲要長期熄燈。呀，嗰陣仲有個閘軌。而家？變咗一樁牆…