Bananasims Workshop

元旦日，同家姐整野食～

西蘭花芝士洋蔥炒烏冬，仲整咗焗薯，不過無影。喺又一城 TASTE 買咗 $57，包咗支 $9.9 大七喜～

今日就去咗美孚補習，萬事達廣場開始翻新完，舖晒啲白色既雲石地板，不過商舖依然不變。

然之後去大家樂食下午茶，$19…呢個就係佢所謂既西多士…下次都係去返美心食

再去又一城行一陣…而家先知 Starbucks 喺戲院入面，唔怪得唔見。不過去 Pacific 算啦

入筆架山隧道嗰個鐵閘個鎖無咗？

有啲比較有趣既相 :$

11 月 14 日去咗大西北，遊西鐵、輕鐵同鐵巴，順便陪朋友試下新舖頭。

晨咁早九點就搭觀塘綫同荃灣綫去尖沙咀買電子產品，順便喺嗰半個鐘內遊一遊尖沙咀啲出口，再轉西鐵。

尖東啲出口一早背到熟晒，尖沙咀嗰啲A B C D 喺邊我都唔知 :$ 每個出口行過下咁，A2 出口條扶手電梯個燈箱放得好型。

去南昌買全日通。以前一向美孚買，貪佢個客務中心近，唔洗喺天安門廣場行，仲諗住車費平啲—一直以黎以為九龍塘—美孚既車費平過九龍塘—南昌，事實唔係，美孚 $2.8、南昌 $2.3。南昌同奧運一樣 $2.3，荔景、美孚、柯士甸就收 $2.8，搭多一個站反而平啲 :S 同柴灣去荃灣平過柴灣去旺角東大同小異。

入大西北，又係元朗落。諗住行個弱智 H 出口，不過附近個出閘機食票。個職員同我講話嗰部機個閘壞咗，好多人都出唔到閘。咁又唔封咗部機 =.=…. 去完個 H 出口再行去輕鐵站搭。因為以為最高係最早開出既車，所以上咗 614，點知睇住隔離啲線咁快走，所以先知睇錯野，轉坐第條線。今次遊希望係續個輕鐵站留影，自己都有個深刻印象。

大棠道、康樂路、豐年路、水邊圍四個站去過唔知 N 咁多次，所以第一個站係屏山。落車，過對面月台嗰陣見到有專車，原來就係載住港鐵職員換錢箱。身為九龍人既我當然覺得新奇，不過屯天元人就司空見慣啦。

然之後慢慢坐…塘坊村、洪水橋、鍾屋村、泥圍、藍地，通通影晒。個藍地站真係恐怖，個月台隔離個石地勁多煙頭。過完堆輕鐵站，去到兆康，再搭輕鐵返天水圍轉西鐵去美孚補習。

補完習去錦上路搵朋友，再去荃灣食野。今次食 Wow! Burger，喺荃興徑。喺荃灣西站慢慢行過去食。間舖頭幾細間，不過咁既天氣，環境尚算不俗。我叫芝士豬柳漢堡餐 $28，朋友叫芝士牛肉漢堡餐 $35（餐包野飲同薯條，野飲加大咗）。個包真係幾好食，相比麥記，個份量大少少，價錢又平少少。啲薯條先好食，樣又似電話線，味道類似 KFC 既薯塊，不過仲好食。

食完返大西北。本來諗住去濕地公園，點知都就到閂門時間，所以改去流浮山。去天水圍站坐 K65。初頭行咗去總站，睇下告示先知走咗去屏廈路。等咗差唔多十五分鐘先至有車。架車好迫，沙甸魚，有位坐都好唔舒服。喺流浮山路站站停。沿途唔會見到任何鄉村風光，反而見到既只係一堆貨櫃場。

去到流浮山，本來充滿期望，點知個迴旋處週圍都只係見到爛路、爛車、貨櫃車。呢啲咁既都算人地所講既「美食天堂」？算，行入去大街。所謂既大街其實只係混亂既舖頭中一條小路，迫之餘又無水鄉既感覺，只係覺得行緊街市。出到去，嘩！原來一個廢墟就叫流浮山？出黎只係見到一堆 rotten structure，一係就見到成堆蠔瞉。見到下低仲嘔心，下低條渠又多污水又多垃圾，睇見就作嘔。條渠仲要係流入后海灣，睇你仲敢唔敢食流浮山啲海鮮？去完海邊我對流浮山既海鮮大失信心，朋友仲話食 $12 炸蠔，算啦，食炸重金屬就有份。

嗱嗱臨搵返架 K65 返天水圍站。搭到去天水圍站轉去天恆邨既天影路特快綫 K76。架巴士喺屏廈路出黎等好耐紅綠燈，不過一上天影路，過一陣（我估七分鐘）就到天恆邨，同喺新世紀坐 K5 機場快綫巴士去九龍站一模一樣。

去到天恆又唔想坐輕鐵，所以又坐 K73 去元朗西。條線同 A73 喺天水圍既走線好似差唔多。好快就去到朗屏，再去到大馬路。我係過咗元朗廣場先至到咗元朗西，所以又要喺安寧路到行去康樂路搭輕鐵去元朗。

去到元朗轉西鐵去兆康，出條橋影低速快門。無腳架，都係放喺個石屎欄杆到。影咗好多張得嗰幾張滿意…無腳架係咁 =.=

最後坐西鐵返屋企。途中，喺朗屏有個人訓著覺，而個電話係咁響。朗屏響到去南昌落車都仲響緊…初頭個個人都望住佢，不過去到錦上路荃灣西啲人已經當呢個音樂唔存在，繼續做自己野…

另外，貼下我喺 iPhoto set 咗我影過既地方 :$

今朝中化堂，18 個人既小組討論。我地討論既係「豐盛人生的條件」…正係發咗一次言就無啦，無野講 =.=

到重點，今日我去 GEOG field trip。我 AL 無讀地理，不過痴埋佢地一齊去，唔洗上 ECON 堂同少咗兩堂空堂。

第三堂 HIST 完咗，就要即刻上車。上車食自製既腿蛋治，加咗啲鹽、千島醬同芝士，好彩調得唔錯，好好味。

架車行呀行…本來諗住架車行大欖隧，點知佢行尖山隧道…照理行大欖隧道快好多…

喺沙田站見到架 M 化千九南行，亦都開始同架千九平排咁行，你唔快過我我又唔快過佢。最後過到去大埔，因為條公路升到好高，再見唔到佢。

去到新田塞車塞好耐，等咗陣最後去到米埔。入去米埔條路外面已經有成堆魚塘同埋基圍，都幾靚。沿住條單線雙程行車既路，就慢慢入到米埔既世界環境基金會既場地。

借望遠鏡（其實唔係我要），再行入去。沿住佢啲路慢慢行。未入禁區，除咗見到好多雀仔外，仲見到好多大殺風景既貨櫃同鋅鐵屋…如果香港有 Landscape Law 晨早就告到反轉…

入到禁區，見到好多基圍同埋魚塘。我同同學掛住影相 + 講壞話，差唔多無聽到個職員介紹…有好多蘆草同植物化石。入面既景色其實黎黎去去都係咁，不過唔知點解又會覺得好靚。

過咗一個淡水基圍、一個咸水基圍同一個咸淡水基圍，就到咗一個蓮花種植區。啲蓮花好靚，仲要係好多棵。不過個職員係咁催，留咗唔夠幾分鐘比人催咗去間屋到。影得幾張 =.=

去到間屋就做任務，話要記錄水質、溫度同含鹽量。呢個幾無聊，係搵泥土微生物嗰個好玩。拎啲泥出黎喺度搞搞搞，啲泥已經本身似屎，仲要一條棍咁，好似搞屎棍。搞咗半個鐘又整完。Present…我用返啲有限既會考知識解釋點解我嗰度既溫度同相對濕度比第二個地方為低。

最後走人，我同兩位影相既同學行喺最後，係咁比老師催行快啲，唔好影相 =.= 最後都成功比我偷影咗五六張

黎緊仲有好多既學校活動黎緊…下個禮拜一睇畫劇…禮拜三聽金管局講座，好充實 呢啲先叫豐盛既人生

南區可以話係我最少去既地區，除咗遠之外，而且係唯一無鐵路到達既地方。交通又擠塞（東邊街、堅拿道成日塞車），可免則免。因為上次去數碼港都係落緊大雨，所以未算好好咁行過。反正去 Kong U Information Day，所以順便再去南區。

坐城巴 30X 去數碼港，坐咗半個鐘到就到數碼港。上次我喺變電站落，今次搭到去總站。去到總站，上去萬麗酒店個平台。萬麗酒店個平台有人舉行婚禮 :$。

我目標係去個「海景台」。行過個商場中庭就係數碼港個「海景台」，即係海濱公園。個海景台類似西九，不過有個大好多既草地。個海景台有啲「高」科技設施，就係之前上過報紙既智能遊戲設施，都唔知點玩。仲有啲小型足球場，仲話十個人，塞唔塞得落呀 =.= 同埋我搵唔到個入口喺邊 :$。

經行過去海邊，草地淨係一邊保養得好，另一邊好差。行過黃色嗰部份成腳都係野，有一粒粒野吉住我隻腳。

喺個海景台慢慢行，見到有人釣魚，有啲人做太極，有人放野餐，比我一種莫名奇妙既感覺。行呀行，行到去數碼港道啦。過對面坐69A 小巴去香港仔。

等咗大約十分鐘就有架 69A 小巴。我好鐘意進智公交啲車，好舒服，啲八達通位置郁過，幾好。$4 坐到香港仔，落車。

落車，因為見有優惠，走咗去太快活食個茶餐。$21（優惠卷令我只係比 $1）就可以有個西多士（加糖膠）＋「珍寶」腸＋辣肉米粉（本身送）＋汽水。西多士就唔多好食，唔夠脆；珍寶腸 ok 的，不過太細；辣肉米粉反而比想像中好食，唔錯。

去完大快活已經見到日落，過天橋行去香港仔海傍。個海傍幾靚，唔少人喺度自娛。香港仔海傍有 $1.8 既舨船服務來往鴨脷洲大街，不過無坐，因為想行過去鴨脷洲。最後行咗至少九個字去到鴨脷洲橋道既入口，上橋。鴨脷洲橋好多人喺度跑步…鴨脷洲橋啲景觀幾靚。行到去鴨脷洲已經天黑。

去到鴨脷洲，落鴨脷洲大街。利枝道夾鴨脷洲橋道有個錯牌，嗰度轉入去利枝道唔係掘頭路。落利枝道就入咗傳說中既鴨脷洲大街。條「大街」好少人，沿路都唔少五金舖。越行越入，到鴨脷洲市政大樓先多返少少人。呢度同大角咀啲街無乜分別。

最後就坐綠小 36A 由鴨脷洲大街去到銅鑼灣站（其實只係利園山道）。架小巴應該係非法的，因為佢係白色豐田 Coaster，無綠色頂 + 「公共小型巴士 16 座位」。另外，架小巴係有成廿二個位，啲位幾迫，不過少人坐就算啦。

去到銅鑼灣搭地鐵返屋企。