話咁快，下個禮拜又測驗週。
測驗週大多數測驗都係理科測，我有同學讀 GEOG HIST LS 淨係測一科 =.=
而我，就要測 M&S ECON 同 CL&C。CL&C 好慘呀…有閱讀、聆聽，仲要有呢個「情與中國文化」既文化評論…
我真係好憎情與中國文化。一係就話中國文化就著重情情情，一係就話咩友情愛情親情，孝之擴展又去到對人如己…愛國，然之後又咩修身、齊家、治國、平天下，真係好攞命 =.=
不過文化評論有啲題目真係好易，好似話守喪三年喺而家呢個社會適唔適合，呢啲求求其其都吹到八百字出黎。
而今日，頭兩堂又係中化，不過唔係講情與中國文化，講人生的意義啦。呢課有趣得多，講人生有好多層：物理層、生物邏輯層、生物文化層同價值層，再用黎分析人既行為。呢課同 ECON 一樣都係分析人既行為，又可以好多野吹。今日小組討論，有人提出：「經濟學假設人係自私的，並會將自己既利益最大化（Postulate of Maximization）。人作出任何既選擇都會有機會成本（Opportunity Cost）。以經濟學角度，假若陳小姐結婚的機會成本是大過她結婚所獲得的幸福，她便會選擇不結婚。」老師都話 ok…
上次嗰題咁難既「人對動物有情」就比我做，而家呢題算易既就無份做… =.=
中間兩堂 ECON 同 M&S。ECON 開始教 Cost, Rent & Profit。Cost 又返返去 Form 4 基本野，不過教返嗰啲 Accounting Cost 呀…Increase in cost is not always undesirable 等等自己睇書學過既野，都幾悶…
M&S…我越黎越鐘意上 Mary Yau 堂。Mary Yau 啲道家無為而治方式，唔收功課，你自己有問題就問數，唔做就你自己搞掂。教數永遠唔跟書 example，淨係拎 exercise 數黎教，佢做我地又做。我覺得咁教數學先好，因為淨係聽佢教係學唔到，反而一齊做數真係好得多。好快又教 Limit 啦，然之後就微積分 =.=..
Lunch Time 後去身體檢查，覆診黎，所以搞咗九個字到又搞掂。最後返屋企。
今日影咗啲相 :$
今朝中化堂，18 個人既小組討論。我地討論既係「豐盛人生的條件」…正係發咗一次言就無啦，無野講 =.=
到重點，今日我去 GEOG field trip。我 AL 無讀地理，不過痴埋佢地一齊去，唔洗上 ECON 堂同少咗兩堂空堂。
第三堂 HIST 完咗，就要即刻上車。上車食自製既腿蛋治，加咗啲鹽、千島醬同芝士，好彩調得唔錯，好好味。
架車行呀行…本來諗住架車行大欖隧，點知佢行尖山隧道…照理行大欖隧道快好多…
喺沙田站見到架 M 化千九南行，亦都開始同架千九平排咁行，你唔快過我我又唔快過佢。最後過到去大埔，因為條公路升到好高，再見唔到佢。
去到新田塞車塞好耐，等咗陣最後去到米埔。入去米埔條路外面已經有成堆魚塘同埋基圍，都幾靚。沿住條單線雙程行車既路，就慢慢入到米埔既世界環境基金會既場地。
借望遠鏡（其實唔係我要），再行入去。沿住佢啲路慢慢行。未入禁區，除咗見到好多雀仔外，仲見到好多大殺風景既貨櫃同鋅鐵屋…如果香港有 Landscape Law 晨早就告到反轉…
入到禁區，見到好多基圍同埋魚塘。我同同學掛住影相 + 講壞話，差唔多無聽到個職員介紹…有好多蘆草同植物化石。入面既景色其實黎黎去去都係咁，不過唔知點解又會覺得好靚。
過咗一個淡水基圍、一個咸水基圍同一個咸淡水基圍，就到咗一個蓮花種植區。啲蓮花好靚，仲要係好多棵。不過個職員係咁催，留咗唔夠幾分鐘比人催咗去間屋到。影得幾張 =.=
去到間屋就做任務，話要記錄水質、溫度同含鹽量。呢個幾無聊，係搵泥土微生物嗰個好玩。拎啲泥出黎喺度搞搞搞，啲泥已經本身似屎，仲要一條棍咁，好似搞屎棍。搞咗半個鐘又整完。Present…我用返啲有限既會考知識解釋點解我嗰度既溫度同相對濕度比第二個地方為低。
最後走人，我同兩位影相既同學行喺最後，係咁比老師催行快啲，唔好影相 =.= 最後都成功比我偷影咗五六張 
黎緊仲有好多既學校活動黎緊…下個禮拜一睇畫劇…禮拜三聽金管局講座，好充實 呢啲先叫豐盛既人生
呢條係一條中化題目，聽日要十八人小組討論。唔知聽日講乜好，不過我淨係知再讀中化人生一啲都唔豐盛。
所以今日又喺度畫指示牌…
Alderney Tramways 既係用 Bell Gothic Standard
已經打咗三日仗，真係好累…好累…無覺好訓
雖然得五科：中化、UE、M&S、ECON 同 HIST，不過科科都幾辛苦。不過，唔辛苦點叫讀書，我零願而家辛苦好過而家清閒。
中化咪作文，無八百字不休。作咗篇新聞評論同埋實用文寫作，兩篇總和約一千八百幾字。分數以我既標準黎講都唔算低啦，7/10 同 59/100，以前會考時代成日肥佬。很慶幸 AL 40% 就合格，不過份卷都會難返啲。
UE =.= 成日Oral 同 Vocabulary Building。我一直以黎都覺得 CE 英文份卷都係易過我小學英文份卷，不過而家終於發現 AL 既英文卷係難過小學卷，好多極其艱深既vocabulary，得個 sophisticated 我係識。另外，都有成日搞 Oral，individual presentation 我練過十幾次，我都好純熟，所以個老師讚 very very very good =.= 我補習老師話我 Oral 至少有 B，希望年半後有 A 啦。
M&S 唔好提啦，Binomial Expressions，見到就唔開胃。睇黎我都係啱做邏輯思考嗰種數，即係機會率、Permutations & Combinations。一直以黎我啲 sin cos tan bionomial function index 好屎，不過 probability statistics 補返好多 =.=
ECON 啲 utility 諗返又幾容易，反而啲 basic concepts 真係 =.= Economic Goods 啲定義改過晒，profit 個咩 unexpected income 真係令人感到好 =.=
HIST 唔想講，又係喺度講 Alliance System，悶到極點 =.= 本 The Rise of Modern China 成功爛尾，睇到 Inter-War Periods 已經無睇 =.=
唉好累，要好好休息。
依然上學…
以前 Form 1 就日日坐旺角特車，而家因為遲起身所以無。今日又難得撞得返，不過我又早到，所以坐入緊站嗰架。以前旺角特車之前嗰班直通車…去咗邊？
去到旺角東巴總，唔知係咪塞車，五六架 79K 出現，慢慢行過去坐小巴。
今日 CL&C 以 AL 會話模式講自我介紹，我就超時講咗四分鐘，不過無 cut 我，ok 的。死人蔡X寶講衰野拉埋我落水，關我咩事？
HIST 悶到嘔 =.= 喺度講 WWI 既其他 long term cause，軍備競賽、軍事同盟…Form 3 學過啦，我零願佢講多啲土俄戰爭既事…
ECON 更悶，成堂喺度講「羅賓遜經濟」，即係一人經濟（one man economy）。嗰啲 transaction cost 好多都聽唔入耳，最後小息如夢初醒最後都要慢慢睇返課文 =.=
兩堂空堂，用咗陣電腦。個電腦用 Core 2 Quad 行 Vista，快到極點，登入五秒，開 Ai 都係三秒…然之後做咗陣 M&S。以前一向自詡 Math 奇人既李X瑤做咩而家走黎問我點做？
聽日去 camp，間學校就鬼咁驚出張咁既備忘…我地唔係 Form 1，係 Form 6 啦…呢個時候都應該獨立啦，仲未識煮野洗碗做家務嗰啲人都唔應該升啦…
