Bananasims Workshop

無打一個禮拜…打下最近既近況…

上個再上個禮拜六，I-Circle 死咗，去到尋日先至開返，總共死咗十一日…有賴 WChost 個新老闆，舊嗰個拆咗 WChost 既伺服器業務去 Geeks。啲人流少咗差唔多一半，真係有賴佢地良好既服務。今次完咗之後，除非有大改善，我好大機會都會用 TEAMagic 或者 Puff 租（定買？）既伺服器

freelance 方面，近排繼續同個 freelance 開工。尋日就真係完工，只係有啲少野未搞掂，不過嗰個客反而無時間，叫我 10/2 先交貨，whatever，每日整一個鐘叫改善一下，因為而家加落加落真係唔少錢。

學校方面，上個星期五同今個星期一就有運動會，全程除咗同同學吹水之後就係喺度練 pan 相。

學業方面，五科既成績都唔太滿意，要加緊努力溫啦，尤其係科 HISTORY，因為始終都係 AL，M&S 都係 AS Subject。見完老師派張野，理科會考 26 分去到高考只係得 18 分，真係好大壓力…我目標係高考 25 分…

享樂方面，尋日就買咗個模擬市民 3：頂級奢華組合，平到裂，$118，以前 $168，相等於個世界歷險記…啱啱裝好但未開始玩…佢張抽獎卡，得支水…

其他野方面，近排有人講下發現咗我部相機原來有一分鐘快門，喺欣澳玩咗張一分鐘快門既全景圖同埋光軌。至於尋日同今日，就喺度同車玩 pan 相…

呢個幾禮拜以黎既野，喺下低個 album 可以睇得晒～

呢間屋叫 The Modern Stone，用石興建既摩登大屋。

第一次用咁既風格起屋。

我覺得呢間屋放喺河景會有 feel 啲。

下載

有啲比較有趣既相 :$

玩咗成個月，整體表現唔錯。

不過我最不滿既係太少人，紫禁城一個人都無，三個鎮既市集得啲商人喺度擺檔，一個行人都無。如果 zoom 落去個紫禁城係同個死城無異。

同埋呢隻野同我期待既唔同，佢太集中喺探險部份。我以為佢會類似模擬市民 2：環遊世界咁樣觀光。我會鐘意觀光多啲，呢隻實在太過 RPG，同埋玩得耐真係好悶。

不過呢隻野細節方面真係做得好好，好似寶藏都分成十幾廿種，每個墓又有一啲印記留低，真係唔錯。

平又平過人，$168，以前 $250 都偷笑。物超所值，值得一玩。

!!! SPOILER WARNING !!!

其實玩落玩黎玩去都係喺個地底玩偏多，都玩到厭。成日喺度鑽石頭推石像穿洞較機關，好悶。

佢既「機會」仲係一條 storyline 黎，即係此機會完成後後面又有機會。我淨係玩咗埃及，話咩模酷犯罪集團試圖控制晒成個埃及既文物，又協助佢班手下玩叛亂，其實玩黎玩去都係喺地底，間中都係喺地面搵下寶石，無主程式咁正。我唔係好鐘意呢種玩法。

陵墓周圍都有，金字塔…你個營地隔離，甚至去到中國既市集下低都有得探險 =.=

仲有幾樣野想講。一樣就係法國首 neighbourhood 首歌，翻炒模擬市民：魔法世界首歌，真係比佢吹漲。中國啲歌唔錯，最難聽都係法國嗰首，好難聽。

另外，我好想再講佢啲中文譯名，簡直膠到喊。夾硬加個模字喺前面，都唔知咩名黎，咩模榭禮舍……模撤哈拉……梅海（叫梅格里拉都叫正常少少…）……聽到真係起雞「毛」……真係比佩服佢既創意…