Bananasims Workshop

尋日因為試 DVI 線同寫 essay，電腦又重，最後選擇搭 72X 巴士返屋企。72X 巴士返屋企係最貴，可以最快，亦可以最慢。

等咗六分鐘先有架 72X，不過無乜塞車，5 分幾鐘就到旺角道（以前都要十五分鐘）。不過唔知邊個屎忽鬼加咗個「嘉道理道」呢個站。「嘉道理道」同「中華電力」爭幾遠呀，仲嫌唔夠密咩，因為呢個站都架巴士停咗好耐等入站…

去到九龍塘站，九龍塘站出面條橋本來既黃白色油咗做白色，邊條屎忽鬼做架…以前咪幾好睇…

最後半個鐘返到屋企，同小巴—東鐵—小巴既速度一樣，不過又平又唔洗行斜路（我覺得唔洗轉車無關係的），所以唔洗叫我坐巴士。

部電腦插足晒四條線

而我篇 essay 都完成了…刪咗好多字…

A-Level 寫 Super Essay？淨係個開頭已經覺得好怪 =.=

前日托我家姐問佢啲港大同學借張五常既「卷1：科學說需求」，因為圖書館亂吸印，搞到好醜樣 最後借咗本靚靚科學說需求比我。連張五常親筆簽名都有！:$

又影張大合照先～

中四有教 Law of Demand，P 升 Q 跌，Demand 係 downward sloping，頂多打橫／打直。而中六用 Indifference Curve Analysis 可以畫到 upward sloping 既 demand curve（P 升 Q 升），稱之為 Giffen Good。呢度就解釋緊點解唔成立。睇咗陣，好似係指 Price 唔係 Cost 既全部。

History~ Versailles Settlement 開始，不過自己覺得第一個 topic：World War I 唔多熟，尤其係 Bulgarian War 同柏林會議嗰忽，要再溫多啲。

尋日因為要執 History 筆記既關係，我喺度搵 clear folder。搵搵下搵到一個被我忘記既「模擬市民 2：度假四季」樂譜。拎到立即走去琴到彈。一開，部琴好多塵。不過，無彈咁耐，我都覺得彈得好好 =.= 好順，無乜甩卡

然之後喺琴櫈到搵其他琴書，最後搵到本 100 Children Pieces，有 Für Elise。呢首歌起碼無彈三四年，所以唔甩就假…

我 Grade 8 嗰本琴書搵唔返，好想再彈返 Nocturne in F minor

然之後老豆叫我用部完全唔識用（亦都唔想要 =.=）既相機，喺度試嗰陣見到啲咁既野…

今日搭小巴喺九龍塘落，見到惡夢開始啦，根德道、沙福道同多福道既紅綠燈組終於啟用。啲車因為紅綠燈塞住晒（特別係真光里），搞到等咗好耐先過到馬路。過到去，見到多福道有一組對住根德道既紅綠燈，我心諗，整黎做咩，嗰組根德道都睇唔到。今次呢組紅綠燈全部用 Z 記燈膽紅綠燈，無用 Telecom。我覺得 Telecom 紅綠燈型過 Z 記，不過點解佢唔用發光二極管呢…

入站，見到對面又有 M 化千九，第四次見到 M 化千九喺對面軌…

---

返到去又係 M&S，然之後 HIST。唉，20 題啱得 17 題，我想攞滿分架…嗰三題完全係低能錯。

• Seven Weeks Wars 既結果好明顯係 Austria 變 Dual Monarchy (Austria-Hungary) 啦，我答咗 German Unification。點解呀…Franco-Prussian War 後先係真正 German Unification……
• U.S. President Wilson 既 13 條竟然記錯係 WWI 完先諗出黎，搞到答錯借錢比德國重建… =.=
• 英國同俄國結盟揀咗 Entente Cordiale (1904) =.=』"』"』 Entente Cordiale 係英法間既良好關係…我竟然咁都錯

---

開班會，傾旅行地點。之前傾咗去黃金海岸，後尾又唔去。因為 TAMAMA 話唔可以搭船，我地諗盡辦法玩野。開咗個 HK-Place 搵資料，最後揀咗三個地點，淺水灣、洪聖爺灣（南丫島）同埋銀礦灣（梅窩）。揀呢三個地點都有不同既政治理由：一個只可搭車，一個只可搭船，一個可搭車同搭船。我地既目的係要令人揀梅窩，再嘈搭船定搭車好，向 TAMAMA 施壓。

首先就話淺水灣要六點霸爐（搵鬼信），洪聖爺灣要行三十分鐘山路（其實十五分鐘），引人投梅窩。投咗梅窩自然要揀交通模式。我地就亂吹一通，搭巴士既交通時間計埋坐地鐵同等車，搭船既交通時間就唔計；搭巴士的話，地鐵嗰程係成人，而搭船地鐵嗰程係特惠。咁樣計完一大輪，再計埋回程，$36 vs $48，好有競爭力

希望聽日有好戲睇

返學開始行旺角道行人天橋。以前一路行呢條橋都係由西至東，見到「旺角東站／東鐵綫」；今次由東至西，見到有個「旺角站／荃灣綫」，乜旺角站無觀塘綫？

HIST 測驗，廿條 MC，包括地理題（例如邊個國家喺聖斯提諾條約 Treaty of San Stefano 後獨立……凡爾賽條約建立咗咩國家…）。都算易既，我都係考天才，未溫過書（其實 History 係無書，要自己睇參考書）。然後講某屈機既 essay，』點解咁多國家嘗試做既和平行動都係失敗？』，好 informative，不過比老師話佢唔係回應條問題，得 20 / 30（其實 21 / 30 係好少人拎），我有佢一成都好 。

今日 ECON 堂完咗就到 UE 堂，班空堂同學帶住成堆戰利品，神雕俠侶、射雕、吶喊…因為圖書館開倉派書，益晒啲空堂人，搞到我無得拎 :@ 不過，我就笠咗張五常本「卷一：科學說需求」同埋幾本英文書，係高考經濟必讀參考書。

順便入去借參考書，睇過下拎咗四本，希望呢五日睇到好多資料去寫條 essay。唔知寫巴爾幹火藥庫好定寫第一次世界大戰既成因好。

搭小巴去九龍城補習。今日唔坐架亡命小巴 70 號，坐佢架小巴根本搖黎搖去，位又窄，我坐 46 號再慢慢行過去仲好。坐 46 嗰陣見到有個通告，話旺角道近砵蘭街同洗衣街加站，本身旺角道個站取消。我就諗，喺砵蘭街停的話即係要 cut 返去中間直行嗰條線，同 265B 66X 37 嗰堆巴士線大交叉咪仲混亂。坐 46 號唔搖有個好處，就係可以拎部 iPod 溫書。叫咗下「眼科醫院有落」，落車。

搭搭下小巴收到 miss 既 SMS 話 5:30 先到，所以去咗法國醫院間 Starbucks 買咖啡飲兼做功課。Starbucks 啲咖啡貴過 Pacific，等又耐過人，只係個環境好。一飲，嘩咁難飲，得啲奶味…加咗啲蜜糖都係咁，算啦…喺度溫書做功課。

去到五點半去補習，無咩特別，只係教成堆 expotential function。因為做慣咗 bionomial 所以都慣晒，並且開始回復狀態… 其實 M&S 都唔係好難啫，考邏輯多…

最後就做咗一件非常柒既事，我搭 85B 返屋企，掛住玩 iPod games 同傾電話，搞到過咗站（入獅隧先知），最後顯徑 dull 咗個大圈，返九龍塘坐老豆車返屋企。

仲有份 ECON 未做，真係攞命 =.= 今日先係 Form 6 10 月 7 日，仲有成年半先 A-Level 呀…要捱埋呢段日字入三大！