Bananasims Workshop

打埋呢篇最後未打既遊記：火炭－粉嶺上水。本來呢，我係無計劃過去火炭，不過因為某些問題（稍後會交代）所以喺火炭出咗閘。既然出咗閘就喺火炭週圍去。

首先，由九龍塘搭去沙田站。我好耐都未去過沙田站，雖則有少少印象，都要去多次 refresh 返我既記憶，順便拎返張車站指南，因為沙田張車站指南有人話係 11 月付印既新版。去到沙田，遊覽下令人驚嘆既車站設計，攞完就去火炭。我有朋友講過南北大堂收費區個客務中心長期無人，佢試過召喚佢，反比佢鬧「無呀！無呢樣嘢呀！阻住晒…」。我首先去北面大堂搵，無人。南面大堂，都係無人。唔召喚佢啦，直接出閘算數。出咗閘左邊見到個客務中心，有人。行埋去，問佢拎，見到條友面目猙獰，兼且極度無禮貌，就咁丟比我。算鬼數，唔理佢。無理由出咗閘咁快又返入去呢？同埋，我差唔多成世都未去過火炭，所以走去火炭行下。

喺南面大堂 B 出口離開。個出口都幾特別，落扶手電梯再拐個 180 大彎先落到去車站門口。扶手電梯格離啲空位變咗雜物房，啲雜物睇到晒…出到去，睇返火炭站個車站其實外型設計都唔錯，不過保養得好差。

火炭最出名係工業區，不過我無興趣，我只係對穗禾苑有興趣。所以我一出黎望地圖，睇下點樣行，不過地圖無指到…印象中有人話過有條樓梯可以由穗禾苑行到去火炭站，不過我就唔知喺邊，所以都係用返車路行。

火炭站行出黎，過橋就轉右，見到大大條火炭路行車天橋。喺路上問途人，不過似乎佢地個個都係藍領工人，唔識路。行呀行，行到真係見到間叫穗輝工業大廈既工廠大廈（火炭 C 出口個名黎），仲見到火炭（山尾街）巴士總站（我喺九龍城補完習通常行去聯合道返屋企，一定係搭 85、85A 同 85B，其中 85 係去火炭（山尾街））。越睇越唔順路，咁啱有個警察經過，就問佢點樣去。佢一聽到話「行」去穗禾苑，就好驚訝，仲問我係「行」定「搭車」去穗禾苑。我之後話行，佢就指返我去火炭站嗰條路。原來我一直都行錯咗路。慢慢向前行，過咗火炭路橋底，就開始要爬樓梯。

去穗禾苑條樓梯都幾長下，至少都一百幾至二百幾級，唔怪得火炭站都有小巴去穗禾苑，不過如果唔趕時間的話／天氣好的話，住穗禾苑行呢條樓梯去火炭站都好，當做下運動。爬咗十幾級之後，見到個燒烤場，仲有人喺度燒…爬多幾級，望左，見到東鐵綫路軌，美景。慢慢爬呀爬，爬到去一個類似劇場既地方，格離仲有個引水道，不過斷估都無乜人用，個地方超級污糟…然後爬呀爬，爬到上去穗禾苑巴士總站啦，又見到一架好親切既巴士－80M…九龍塘鐵路站－穗禾苑。上到去，買枝雲呢嗱可樂補充下體力，就落山，因為唔夠時間去上水，同埋穗禾都睇落好似係一個普通既公共屋邨。行呀行，行咗十分鐘，返返去南面大堂。

當然唔單至去穗禾苑，火炭有個前九鐵既京師，同埋入站前我記得有條吊橋跨過個大埔公路，所以又八卦去睇下。火炭鐵路大樓無乜野特別，只係離遠見到大大個 MTR 字樣。慢慢向前行，去到條吊橋啦。吊橋都唔算多人，不過無時無刻都有人，所以好難影到張靚相。行呀行，左邊繼續見到港鐵火炭大樓，仲見到啲工人喺度整路軌，下低有兩條「廢軌」。行到中間有條樓梯行落去大埔公路。唔理，繼續向前，行呀行，左邊見到體育學院啲人喺度踩單車訓練。行呀行，行完吊橋，就到呢個「火炭河」既河口了。見到，返返去火炭站。

當然未行完啦，北面大堂有條長扶手電梯又要行。沿住火炭站外面既路行，見到個跨大失實既「豪宅」之後入咗 C 出口，再去 D 出口，搭長扶手電梯落去。落到去見到何東樓車廠既入口，睇完又上返去入閘，去大學。

去大學站既目的又係拎車站指南，我喺月台拎咗就咁原車上離開

然之後就搭去上水…我未試過喺粉嶺上水出過閘，今次就試下啦。喺上水出咗閘，聽 a52ljgh89 講，去到北區大會堂中間個公園到睇，起得幾靚的。然後就去北區公園，途經一個龔如心起既商場，管理得好差，比惠康同埋 M 記霸晒…行呀行，去到智昌路入咗去北區公園。嗰忽無乜特別，得兩個籃球場同兩個網球場，過咗個掃管埔路先精彩。

過咗掃管埔路，已經見到幾棵柳樹，好多其他樹裝飾，好靚，然之後就見到個湖。個湖保養得幾好，唔似 a52ljgh89 話咁差。呢個公園有少少荔枝角公園同埋嶺南之風既 feel，不過都無佢地咁勁。呢個北區公園入面有好多唔同種類既花，同埋有好多中國古式建築，啲窗框好似變咗畫框咁。喺度影咗幾張相，就繼續向南走，去到一個圍村。

個圍村門口有個大廣場，不過寫住唔准放風箏。嗰度有種天水圍屏山嗰種 feel，中間有個石屎風水池塘，不過附近一棵樹都無，不過又見到魚…無乜特別，所以行去新運路。

新運路係一條林蔭大道，同粉嶺上水好多街都係咁，沙田都無咁多。沿住新運路行，就見到一條穿越粉嶺公路既行人天橋。呢條就係我夢寐以求想去影車既天橋。二話不說，立即上去。話說嗰陣已經係夕陽，向西影個太陽真係好靚。去到東鐵綫路軌上面，見到一架又一架既 SP1900 同 MLR 穿過，而粉嶺公路又影到啲車郁，好興奮，留咗喺度影咗十五分鐘。如果再夜啲同埋較埋快門，可以將粉嶺公路啲車影到一條線咁。

繼續行，今次目的地係粉嶺站，因為太陽落山，要離開。行到去尾，就見到 a52ljgh89 提到既百和路。沿百和路行，行行下，見到張粉嶺車站指南，睇落唔對路，所以行咗入條屋邨入面。入面亂咁行，唔知點行行到去個商場，點知又見到我既死敵…小食…去咗間舖頭買咗個格仔餅同埋章魚燒食，總共 $19，好好味！之後問個老闆，沿住佢教我行嗰條路，去到粉嶺站，搭千九返屋企。

今次有少少走馬看花既感覺，穗禾苑只係去咗間 7-11；火炭河河口又去得嗰幾分鐘；上水粉嶺更加唔洗講，因為唔夠時間。下次試下逗留喺上水站週邊耐少少，再沿百和路去到粉嶺站，再留喺嗰度一陣。今次可以算係「拓荒」，至少都可以同人講我去過粉嶺同上水。

火炭站

前九廣鐵路啲設計真係難頂。前幾日去大埔墟，有太多時間去下火炭站同埋大學站行下。前九廣鐵路最興喺東鐵綫啲站整埋晒啲咩東南西北大堂，九龍塘、火炭、太和、上水……全部通道分開，又唔係好似前地鐵咁樣技術問題無得連接，離晒大譜。

火炭有四個月台，兩個島式月台。四個月台都有車停既。個月台窄到嘔電，同旺角東差唔多。因為火炭有兩個大堂，所以我兩個大堂都上去睇下，有咩特別。我比較鐘意坐車頭，所以喺車頭第一對門出咗黎，再上去北面大堂。我係搭扶手電梯上去，上到去乜都無，幾間喺非收費區既舖頭同埋設計樣爆既牌同埋裝修。諗住去南面大堂啦，點知只係比你行樓梯落月台…條樓梯同九龍塘 H 山口條走火梯有得揮，可能仲勁過屯門碼頭嗰條，又窄又高。落到去，沿住窄爆既月台行，去到南面大堂個出口，又係同北面大堂有得揮，樣爆，仲見到黃頭標誌…九廣鐵路好心你將起西鐵啲錢去翻新東鐵啲站啦…唔知港鐵大翻新之後個站會點呢。仲有，火炭既南面大堂既英文係 South Concourse、北面係 North Concourse，而唔係九龍塘既 Northern Concourse、Southern Concourse…真低能！之後諗住搭去大學，坐車頭，點知見到一個香港人同埋兩個菲律賓人比人查票，仲喺嗰啲紙皮石基座上面喺度簽罰單…我估係非法坐頭等，因為嗰個位喺正頭等上面。

搭去大學……大學係最令我 『impressed』 既站，讚佢的話就話佢空氣流通，充份利用大自然既資源。差既就…講唔晒…空隙又大、又無頂（搭頭等仲要受淋雨之苦，係完全無頂）、又彎、用輪椅或者行李又要行一大段路…不過大學站最特別都係佢條斜路，由大堂上去月台，全部九鐵站最獨特既一個。其實呢條路都唔錯，不過都起部電梯方便下人…唔係人人有力拉上去。

去到大埔墟。大埔墟既月台同火炭差唔多，好窄。不過大埔墟近新達商場嗰忽大裝修，幾靚。以前啲啲窄到爆既通道而家都闊落咗，同埋光咗。有間樓上美心 MX 同埋有間小食店，嗰度都幾多人，地下裝修都唔錯。

總之，希望所有東鐵綫站快啲裝修完，起啲玻璃幕牆或者欣澳嗰隻，特別係啲露天站。呢啲車站既設計根本離晒大譜，完全唔舒適，啲狗鐵膠仲可以話「四季怡人」…