Bananasims Workshop

打風嗰日無野做所以走去數碼港行下，點知同我想像中好大段距離。

首先行落山，和域道夾義德道嗰棵竹最終都係比風吹倒，享年 30 歲。

搭去深水埗同 iPod Touch 買野，然之後經荔景搭去香港轉 30X。荔景架車入站嗰陣啲雨飛晒埋黎個月台到，好彩有幕門咋 =.=

30X 坐咗好耐先去到數碼港，有啲後悔點解唔坐小巴。數碼港個商場差唔多完全無人行，得幾間地產舖同食店。因為一場黎到試下佢啲嘢食。叫咗個叉燒飯連雪碧，$32。一食舊叉燒落去，嘩，臭既。叫個人食舊叉燒，佢自已都吐出黎，最後吐返 $28 比我。睇返張單，Char Siu，佢都好野。

因為落大雨，本來行去華富既大計一定唔得。所以搭小巴去香港仔行下。我無遮，所以都係亂行，最後行到去間 M 到坐低飲咖啡上網。最後坐小巴返銅鑼灣轉地鐵返屋企。啲交通費起碼晒咗成三十幾蚊，有啲後悔…

另補：今日喺界限街發現既野…

呢幾日我都無見過雲了，成個天都係好靚既天藍色，應該係因為金融海嘯，好多工廠執晒笠，所以就有呢個藍天掛…

今日無野做，本來約咗人，點知條友要溝女唔理我，所以我遊下我既社區：筆架山。其實我住筆架山咁耐，好多地方都未行過、去過。其實我未入過去朗德道、義本道、獅子山隧道公路格離個油站、伊利沙伯大廈格離條長樓梯、龍翔道行人路、碧景林路嗰邊既筆架山道同埋根德道公園，都係去過一次。今日就行下啦，不過無去到碧景林路同埋根德道公園，因為比較遠。

首先喺我屋企出發，行義德道上山，上到去筆架山道轉右去朗德道。去到朗德道，原本以為有窩打老道以及九龍既美景，點知入到去，有成堆樹阻住晒個景。原來個美景只會喺個屋苑入面望到，算數。

出返黎轉右，有個龍翔道公園（其實龍翔道入唔到去）。我好細個成日黎呢個公園，嗰陣時日日都有細路喺度玩，仲有好多青年人打籃球。呢個情景不復見了，因為一個人都無…可能個個都走去打機，或者好多都搬走…喺呢個公園搵返好多舊野，有個好得意既音樂鍵盤同埋有個迷宮既玩意，以前覺得好好玩，而家就…

出返黎筆架山道，行呀行，行到去義德道交界。義德道同埋筆架山道交界有個三角形既街口，我記得以前小學旅遊巴成日喺度落客，有次仲唔少心撞爛咗個街牌…嗰陣時啲同學會行過個捷徑，好似「公園」（其實係一條巷仔，無名）。而家成日搭小巴，呢個巷都好少見…

再沿筆架山道行，就係掘頭路，左邊係筆架山屏風，右邊係啲獨立屋（我近排先知原來筆架山上面有獨立屋），前面仲有棟成廿層樓既建築物，破壞晒景觀…以前前面係個斜坡，左面係美國國際學校。當時搭樂富既免費穿梭巴士黎到義本道個站落車返屋企，見到個高高斜坡，好似有鬼，都驚驚地。而家？…

掉頭，去伊利沙伯大廈格離條樓梯行上去龍翔道。條路都日久失修，啲欄杆下面係離地的，我連欄杆都唔敢扶，只喺中間到慢慢行上去。行到去就係龍翔道，有個隔音牆隔住，乜車聲都聽唔到，而乜相都影唔到。

本來諗住落山返屋企既，不過諗起一場黎到，不如行埋龍翔道，行到去獅子山隧道公路。所以我轉右行，行呀行，行到去近獅隧，就見到前無去路，右邊有條長長既樓梯（不過梯級都幾闊下）。行落去，聽緊首好緊張既歌，嗰陣既感覺好似有山賊咁，快步走到落去獅子山隧道公路了。之後就慢慢返屋企…

好多時，你去過其他地方好多次，不過可能連自己附近既地方係去都未去過。係時候喺自己既社區週圍行下，增加對自己社區既認識。

P.S. 要相的話，去 WLM 問我拎。

九龍塘筆架山義德道的小型工程。

近排金融海嘯，政府就狂整錢去起啲小型工程，諗住解決工人無工做既問題（特別係澳門回流既香港人）。不過，睇落去好似無人有損失，不過其實有啲人做係辛苦好多。我呀媽講過，其實工作量大增，就係紅磡建新中心（建築署）既人。上頭落 order 話今個月每人要洗成萬蚊做小型工程，啲人就要走去搵呀搵，搵邊度有工程做，好似比一百萬蚊你只准你買菠蘿包，仲要食晒。香港已經發展到無得再發展，再搵真係好難。通常啲小型工程就係搵條石屎路掘做磚路、搵啲地方加個路牌又係。而家好多工程都變咗為掘而掘，為創造就業而創造就業，浪費納稅人既錢。暑假嗰陣九龍塘全部街，遠至對衡道、蘭開夏道，近至筆架山道、義本道、歌和老街又加成堆街牌。仲離譜既係義德道加成排又高又低又左又右既牌，樣衰到爆，呢啲就係叫小型工程，創造就業…不如用呢啲錢喺返義德道同窩打老道中間到種樹啦，之前水務署爆咸水渠搞到嗰兩棵大樹死鬼咗…呢啲咁既小型工程我真係頂唔順…義德道間弱能兒童學校又整斜坡，隔離個球場都差唔多一年整一次，都唔知成日整黎做乜…個球場個 condition 又唔係特別差，不如加幾盞射燈當幫下忙，夜晚走去踼乜都睇唔到…

要解決呢啲就業問題，十大基建真係要盡早上馬，特別係東西綫（沙中綫）同埋南北綫（沙中綫過海段），呢啲工程不僅有助創造就業，搭車又方便咗，而且會增加 productivity，何樂而不為呢？