Bananasims Workshop

今日係 2009 年 9 月 1 日，即係開學日。

晨咁早七點鐘行落去九龍塘站，坐九龍南線去奧運站返學。入閘嗰陣用 iPod 計時。九龍塘站係側式月台，一入月台就好驚訝，因為對面月台既人有平時既兩倍咁多。上咗架去紅磡既車，再喺紅磡轉。架車入 1 號月台，個 LCD 電視寫對面 3 號月台仲有四分鐘開，而 2 號月台兩分鐘，當然跑過去另一邊月台。過到另一邊，架車先啱啱入站，嗰陣就見到另一邊等緊西鐵既跑過黎 可惜，過咗一陣已經閂門，全部送車尾

搭西鐵搭到去南昌，落車過對面。等咗陣，有架 K 到站，仲要係 X813 =.=』"。架車同平時觀塘綫早繁差唔多迫，架車好似我間學校包起晒，全部都係同我同一件校服既學生 =.=』"。

搭到去奧運站，經奧海城二期返學校。奧海城二期而家朝早熄埋冷氣，我零願行戶外算數。

最後返到學校要 7:45，用咗 37 分鐘，比平時去旺角東轉小巴既 18 分鐘爭成倍。

---

返到學校上四樓既 Form 6 課室。間課室超細，三張枱拍埋一齊上堂。我嗰班 36 人要間咁細既課室，格離班 30 人就最大既課室 :@。

朝早個班主任講下啲無聊嘢（聽咗六年），就落去操場升國旗唱國歌。後尾校長第一次演講，佢拎支無刨既鉛筆問我地記唔記得？大佬，上年考會考嗰啲都無聽你亂嗡，點知呀。就算我地聽過，我地都淨係記得你個教職員廁所開幕典禮，因為實在太刻骨銘心。

去禮堂，個安排好亂，竟然又係唔夠位，搞到男仔分開兩忽。班女仔勁嘈，超乞人憎。喺開學典禮，除咗介紹新老師，送別 HH Wong（我上年既班主任，資深數學老師，深受愛戴），仲有就係繼續返上年結業禮無做既頒獎 =.=』" 悶到嘔

聽完佢嗡就返課室，都係講下啲班務，派下回條解釋下通告。個「中六領袖訓練營」好弱智，之前仲要個營前訓練 =.=』" 派時間表，個時間表錯漏百出，M&S 無收錄，仲要多咗個 CL。有啲讀 2AL 既就正，勁多空堂 =.= 我就得嗰四堂。

---

離開學校就走去大角咀食飯。大角咀啲飯已經無食成半年，而家食返真係好正，好好味。

食完行去遵理旺角分校（其實油麻地黎）報 ECON。而家先知信和斜對面 M 記上面係遵理。用咗半個鐘到報完名，不過等升降機落去等咗成五六分鐘。遵理只係一樓，不過樓梯變防火梯，升降機又停咁多層 =.=

行去油麻地站搭地鐵去樂富影學生相。我已經好耐無行樂富中心，去到樂富中心以前豐澤嗰度真係 O 晒咀。以前樂富門嗰個廣場而家變到好似天水圍領匯商場個中庭咁；以前東東雲吞面個位成個空咗，變咗中庭。而家先知WELLCOME 同 KFC 原來只係上下層既分別，房署啲設計都幾有問題。不過，靚還靚，個商場真係太單調。我一入去就以為自己入咗天水圍嗰啲商場，一式一樣無黎特色，以前啲舖頭通通無晒，變晒啲波仔等等既連鎖店。我零願要以前既樂富中心而唔要而家既樂富廣場。

搭免費穿梭巴士返屋企，經過聯合道嗰陣發現佢將以前熟食中心上面好有藝術感既花紙圖案全部拆晒，變到好似荷里活廣場咁，無晒特色…越黎越貴，係咁的話我零願比車錢去石硤尾食都唔去樂富食。

中六生涯尚未開始已經無得再 hea，因為而家仲要做補習社 M&S 功課，做極都做唔完咁 =.= 聽日仲要繼續補 Combinations 同 Permutations。加油！

九龍南綫係指港鐵西鐵綫既延伸，由南昌經柯士甸、尖東去到紅磡，並且連接東鐵綫。雖然尖東站會還返比西鐵，由頭到尾我都期待咗呢條綫通車好耐，因為我既生活圈子都係位於西鐵既沿綫（或者附近），包括法國文化協會（柯士甸）、學校（奧運）、補習（美孚）等等。

前日，2009 年 8 月 16 日就係九龍南綫既通車日。晨咁早八點就已經走去九龍塘站坐車去九龍南綫，觀望一下並且決定未來既交通。等咗差唔多 3 分鐘，上咗車就出發去紅磡。

由旺角東去到紅磡嗰陣時，本想聽下個新廣播（下一站：紅磡，乘客可以轉乘西鐵綫）。不過由頭到尾播都無播過。算啦。搭到去紅磡落車，有幸見到有架西鐵列車入對面月台，所以快快趣趣上車。

上咗車坐咗喺度，喺度望住個電視機。慢慢就過咗三分鐘，我好奇怪點解總站既車要咁耐先開。後尾月台長人手廣播「西鐵綫列車將於九點正開出」。望下月台個鐘，8:54！？有無搞錯，東鐵縮返紅磡我都係期望用得五分鐘，而家竟然要等八分鐘？

等咗八分鐘，呢架西鐵綫列車就開出啦。呢個路段因為過海都成日搭，所以無乜特別。去到尖東，睇下隻錶，發覺已經用咗十五分鐘。以往由九龍塘去到尖東都係 7 分鐘，而家 15 分鐘仲耐過我坐地鐵，所以我都係會坐返地鐵去尖沙咀。望出去出面啲幕門，以往既粉藍色已經變晒紫紅色，而好多設施都比人廢咗武功或者拆咗，好似頭等核准機等等…已經唔係我熟悉既尖東站。

等咗差唔多成分半鐘，尖東閂門，終於出發去柯士甸站。柯士甸站由頭到尾無比我好感，反而係反感，因為佢個抽風樓係大到無倫，加埋隻色係極為突兀，完全同周圍環境唔夾。學我呀媽話，「都唔知邊屎個設計師設計」。不過畢竟內部都淨係睇過人地啲相，相同埋真嘢始終有距離，內部都係去到先作決定。

一開門開，就立即聽到班為民請命既議員吠。我就立即戴上耳塞以保持我有一個舒適既乘車環境。一眼望個柯士甸站，髓圓形既柱、花紋非常假既假雲石地板，加埋螢光綠、螢光紅既扶手電梯燈箱，比我第一種感覺係同靈堂無分別。個月台咁核突加埋有成堆噪音喺度我都無乜興趣留喺度，上大堂。大堂無咩特別，行咗幾轉之後就出閘。

喺柯士甸站，啲大使爭住派車站指南，所以我都有一份。我就睇車站指南上面刊載既車站結構搵地方去。由於我頭先去咗 D 出口嗰邊，所以我由 F 出口開始行。見啲指示指住兩條路都係去到 F 出口，所以慢慢行。行到先發現變返一條通道，中間嗰一間舖頭完完全全將 F 出口既視線擋晒。行到上去，其實就係徐步高隧道嗰個出口。

行返落去，就行去隔離既 D 出口。D 出口係南面大堂既地面出口。D 出口內部設計尚可接受，整咗個假閣樓出黎扮下野。不過都係有好多野我唔鐘意。好似匯文道夾柯士甸道西嗰邊係無出口，不過又有成堆舖頭，叫人點行過去買野呢？另外，呢個大堂真係大咗少少，最好喺個大堂中間加啲藝術品（最好綠色，同啲橙色制衡返），感覺一定好啲。另外出口啲門就係都要分兩個，都係唔明打通佢地有咩嘢問題。而家咁樣都唔靚。

行完 D 出口就去 A B 出口啦。A 出口係佐敦道出口，一行隧道上黎就係法國文化協會，所以我都要試下，睇下佐敦站定柯士甸站適合啲。A 出口全程都係轉彎的斜路，上到去就係政府行人隧道，出地面就係佐治五世公園，行去法國文化協會實快過佐敦，因為唔洗過馬路同埋條路本身短。不過，唔知道呢啲慳返黎既時間補唔補償到轉車既時間損失。

最後就係 B 出口「圓方」。呢個係我覺得最核突既出口。呢個 B 出口除咗係北面大堂既地面出口，亦都係天橋出口。呢個出口大堂嗰邊既設計同荃灣西既地面出口大同小異，都係喺大堂中心挖三條扶手電梯上去。上一層就係 B1 B2 出口。同南大堂既門同一個問題，一對門分開兩個，都唔知有乜好，我淨係覺得好核突。再上多層，就係最核突既 B5 出口。B5 出口呢就連接住政府行人天橋。唔好聽港鐵宣傳話咩有頂又唔洗驚曬又乜，呢類行人天橋同塘尾道夾亞皆老街嗰啲一樣，有頂等如無頂，落雨一樣濕身。另外本身條天橋就係連接個巨型通風樓。條細天橋同埋巨型通風樓相對比，同柯士甸站同廣東道政府合署一樣，超級核突！

去完柯士甸，就搭返西鐵去南昌，再搭去尖東。尖東站頭先講過，頭等核准機又拆晒、幕門貼紙換晒紫紅色，連下班列車既 PIDS 、大堂既巨型班次顯示屏都停用，班次顯示屏更係顯示從未見過既數字（8… 12…），真係唔再係我熟悉既尖東。尖東，再見啦，我都唔會再用你，坐返地鐵慳返啲時間仲好。

再去紅磡，頭先去紅磡只係想體驗下對面月台轉車。一落車就望下堆 PIDS。老實講，我覺得呢堆 PIDS 都係做得好差。PIDS 應該顯示架車仲有幾多分鐘到（好似 5 分鐘），而唔係實際到達既時間，因為乘客見到 PIDS 係想知下一班列車係喺邊個月台開出同埋有幾多分鐘開出，而家咁顯示要乘客計一計數係唔 user-friendly。

上到大堂，只係見到四面八方一大堆 PIDS，又成日有啲特效（向上移入），真係花多眼亂。我零願佢淨係裝幾個算數，唔好裝咁多。

最後，落返月台坐西鐵去到屯門，再由屯門經紅磡搭去上水，同人計時間。最後計到既時間係比港鐵路綫百科既略快。聽過屯門既朋友講西鐵如果喺西鐵站出發會快過巴士至少十分鐘，希望多啲人坐西鐵啦。

最後我都係決定唔會坐西鐵去我既地方，我以後都會照坐東鐵綫去旺角東、觀塘綫 + 荃灣綫去美孚同佐敦、觀塘綫 + 荃灣綫 +  東涌綫去奧運算。我過海以後亦都會選乘觀塘綫 + 荃灣綫。本來諗住以後全部用西鐵，不過今次通車後決定唔會，可謂「期望越大，失望越大」。