尋日喺美孚補完習，就喺美孚新邨 5 期搵 Jacky 食飯。好耐無見，行到去 6 期麥記諗住食，點知發現貴到死…過去對面 4 期美孚廣場，都係咁貴，所以最後去 8 期（近吉利徑）嗰間美心 MX 食。
食完佢走去石硤尾，反正順路所以一齊。喺石硤尾留咗陣。
好彩時間啱啱好，搭去樂富坐免費穿梭巴士。
—–
來自英國 Brighton 既 Kenneth 返咗黎。本來諗住前日去尖東，不過問完佢話唔得閒所以尋日先去。
尋日補完習之後，喺屋企溫咗陣書就去佢屋企。搭免費車 > 樂富小巴 > 順緻苑。玩咗陣無聊野就搭小巴去彩虹搭去紅磡。喺紅磡慢慢行過去尖東。本來又係想食美心 MX，不過見到 Wow! Burger 就入去食。Wow! Burger 食咗$39，啲服務同荃灣爭好遠，不過真係好好食。
然之後走去半島中心 book 枱。
最後就喺尖東同出黎海皮影燈飾，影咗三個幾鐘。我完全未學過影燈飾，所以影得幾差。
試咗張 HDR
夜晚梳士巴利道同麼地道好少車，啲低速快門無一張 ok
今日開始測驗週，不過自 Form 5 已經對測驗週麻目，因為日日都是測驗天。
又如常行落九龍塘站。我想講棟創新中心好耐…呢棟野既英文名叫 InnoCentre，咁睇係無問題。不過轉做全大楷，INNOCENTRE，我初頭喺達之路坐私家車仲以為係 innocent…
有邊個仲記得以前九鐵時代個核突樣？
成個站粉紅色、核突藍色牌、九鐵 logo、白色石屎、無欄杆（logo 上面嗰度）、黃色通風樓、焗漆版舖頭…而家換晒啲表面嘢…好想佢快快趣趣拆晒成個站佢換新野。
非常「有幸」地返學放學坐中八架千九其中一架。一向都唔鐘意千九，MLR 靚仔好多。換咗貼紙好得多，不過都係好樣衰。
無無聊聊走去A 出口走，喺轉乘通道見到呢個九鐵牌。佢令我諗返起以前 B 出口一落黎轉左搭東鐵、轉右搭地鐵。以前九鐵個牌落樓梯嗰陣係睇唔到，仲要長期熄燈。呀，嗰陣仲有個閘軌。而家？變咗一樁牆…
今日如常去九龍塘站搭車，因為新燈口啟用既關係，等咗好耐先過到馬路。入到月台睇住架 MLR 走。然之後等下一架，見到千九頭，最後見到車身係有黃色貼紙，係 M 化千九！已經撞到五次，終於有一次坐到。
除咗車內外個「請小心月台空隙」較為明顯外，其他都唔明顯，完全唔覺換咗，幾靚。搭到去旺角東，仲見到張「往尖東升降機」存在，因為預多咗時間，所以順便影埋。
返學，做中化既文化報告。文化報告要睇嗰篇「與青年談中國文化」同「情與中國文化」。第一題問「孝的本源及作用」係咩，我諗極都諗唔出，最後話「孝是人對父母的情，乃人的本質，是孝的本源。孝的作用是讓人飲水思源，進行情感教育，從而使人對其他人感激，達致最高的道德水平。」（寫咗大約三百字）。第二題一話說明「責善，朋友之道也；父子責善，贼恩之大者」同「身體髮膚，受諸父母，不敢毀傷」喺現今社會適唔適合，我就勁多野寫，寫咗成張英文單行紙，可惜都係唔夠時間，TAMAMA 唔比我地遲啲交。
ECON 教 Use Value，呢課無 Indifference Curve 咁玄，因為就係講緊我地既心理。我覺得部 iPhone 值 $3000，咁佢係我既Use Value。不過實際佢賣 $8xxx，所以佢既 consumer surplus 就有 -5xxx。整剪報易，不過我都做咗七份，所以都要去到十一月尾先至會運用到。
然之後學生會選舉。本來空堂，而家 :@ 學生會選舉好正，個冼焯以段片正到無論，拎 2003 7.1 地鐵站迫爆既片，然之後重新配音，話咩「爭住投冼焯以」，不過又彈啲「香港末日」既橫額，好正…助選團環節就有個「冼焯以幫你洗桌椅」環節，Tracy 播美少女戰士變身著洗衣衫洗桌椅，笑到肚痛。
其他組啲表演只可以用「智障」黎形容，唔想多講。
最後到投票環節，當然投 3 號冼焯以。不過喺張紙到，竟然見到「洗」焯以……
返屋企，比我撞正無公德心巴士司機塞住旺角道，比我影低。呢條線係 2A 去樂華。呢啲巴士最乞人憎，搞到旺角道彌敦道以西塞個不停。
同人補習，我朋友呀媽叫我幫佢補 =.=』 我何德何能，不過都係同佢補。佢讀 F4，我同佢補 334 ECON。佢學咗一個月都係搞唔清機會成本、Production 啲 concept，要慢慢教。334 ECON F4 好似已經教堅尼系數，所以我都要早啲學。
今日搭小巴喺九龍塘落，見到惡夢開始啦，根德道、沙福道同多福道既紅綠燈組終於啟用。啲車因為紅綠燈塞住晒（特別係真光里），搞到等咗好耐先過到馬路。過到去，見到多福道有一組對住根德道既紅綠燈，我心諗，整黎做咩，嗰組根德道都睇唔到。今次呢組紅綠燈全部用 Z 記燈膽紅綠燈，無用 Telecom。我覺得 Telecom 紅綠燈型過 Z 記，不過點解佢唔用發光二極管呢…
入站，見到對面又有 M 化千九，第四次見到 M 化千九喺對面軌…
首先就話淺水灣要六點霸爐（搵鬼信），洪聖爺灣要行三十分鐘山路（其實十五分鐘），引人投梅窩。投咗梅窩自然要揀交通模式。我地就亂吹一通，搭巴士既交通時間計埋坐地鐵同等車，搭船既交通時間就唔計；搭巴士的話，地鐵嗰程係成人，而搭船地鐵嗰程係特惠。咁樣計完一大輪，再計埋回程，$36 vs $48，好有競爭力 
希望聽日有好戲睇
依然上學…
以前 Form 1 就日日坐旺角特車，而家因為遲起身所以無。今日又難得撞得返，不過我又早到，所以坐入緊站嗰架。以前旺角特車之前嗰班直通車…去咗邊？
去到旺角東巴總，唔知係咪塞車，五六架 79K 出現，慢慢行過去坐小巴。
今日 CL&C 以 AL 會話模式講自我介紹，我就超時講咗四分鐘，不過無 cut 我，ok 的。死人蔡X寶講衰野拉埋我落水，關我咩事？
HIST 悶到嘔 =.= 喺度講 WWI 既其他 long term cause，軍備競賽、軍事同盟…Form 3 學過啦，我零願佢講多啲土俄戰爭既事…
ECON 更悶，成堂喺度講「羅賓遜經濟」，即係一人經濟（one man economy）。嗰啲 transaction cost 好多都聽唔入耳，最後小息如夢初醒最後都要慢慢睇返課文 =.=
兩堂空堂，用咗陣電腦。個電腦用 Core 2 Quad 行 Vista，快到極點，登入五秒，開 Ai 都係三秒…然之後做咗陣 M&S。以前一向自詡 Math 奇人既李X瑤做咩而家走黎問我點做？
聽日去 camp，間學校就鬼咁驚出張咁既備忘…我地唔係 Form 1，係 Form 6 啦…呢個時候都應該獨立啦，仲未識煮野洗碗做家務嗰啲人都唔應該升啦…
bananasims
一位喜愛香港地方、城市規劃、鐵路、網頁製作、程式編寫及模擬市民 3 的香港預科生。