唔知點解無啦啦彈乜鬼 MySQL error，懷疑有人同我改咗個密碼。
前日星期六，大清早同李振昇班友喺九龍仔業主會開餐打網球，玩咗兩個鐘，非常有趣。原來個保齡球場閂咗，得返個兒童自助遊樂場 =.= 最後都係打網球打晒啲時間。
之後約咗 Andy 出黎，諗住話遊覽下九龍塘，我就做「導遊」。
第一個景點係成龍間辦公室。成龍辦公室唔知點解又封咗裝修。以前小學時代成日入去買汽水，三蚊罐，而家已經唔比 =.=
Andy 話九龍塘（九龍仔）好有外國 feel，所以帶佢喺九龍仔週圍行下。入九龍仔邊少得渭州道，我最鐘意呢條街，貪佢靜。行完渭州道，仲有行牛津道、蘭開夏道同喇沙利道，就去馬頭圍。行到去接近喇沙利道游泳池嗰陣，有舊雀屎飛埋黎我個膊頭，頂，最後行去書院道間補習社借洗手間洗甩佢。
去到馬頭圍其實都係為咗坐巴士去尖東食 Wow! Burger。懶得等架 11K，坐 5C 去食。Wow 嗰陣牛肉味真係好味得難以形容 
。去完之後下一個地點就係馬頭圍道塌樓現場。
行去塌樓現場就必經紅磡區。紅磡區我就好少去，上次去都係由加士居道行到去殯儀館嗰頭，機利士南路嗰頭就無行過。其實又係無乜特別，感覺好似荃灣。
去到塌樓現場，嗰段馬頭圍道依然封咗。45 號嗰排樓就拆咗三個 block，三間舖，拆到去一間髮型舖。睇 Google Street View 就見到拆咗間「新 OxO」、「溢昇珠寶金行」同埋 7-11。不過睇返新聞圖片，盜昇珠寶金行已經變咗 DVD 舖。流連咗一陣，上咗去嗰間大家樂睇下嘢，就繼續向北行。
因為又去返熟地方，所以走馬看花，行呀行，行到上何文田，又落返九龍塘，返咗我以前讀既小學。
上次返小學都已經係中二，所以又返去小學門口留返幾張相。小學都變咗好多，課室編排變晒，不過無變既依然係條火車軌同埋一個咁大既操場同草地。
小學隔離既中學隔離有條行人隧道上又一村，不過我咁耐都未行過，今次就第一次行。原來嗰條樓梯上到去都望到九龍塘景，不過比個隔音屏障阻住，扣咗啲分…九龍塘景一係就龍翔道觀景台，一係就太子啲高樓…
去到又一村，我就當然成日黎，不過 andy 無黎過，所以係咁二行下幾條街，花圃街、雀橋街、海棠路同埋地錦路咁大把。然之後就慢慢沿達之路行去又一城食飯。
呢個長達六小時既旅程都完結～
另外，呢牌唔知又乜嘢病，頻密肚痛，shit
有小學同學搵我出黎，所以今朝就同佢去沙田中央圖書館溫書。
前日去又一城買餸嗰陣已經見到路面下低漏水，估唔到而家爆埋出黎…
我同佢唯一一科有一齊讀既就係 ECON，所以就溫 ECON…今日就溫 Cost & Rent，其中 historical cost 溫咗好耐。A-Level 都無得背答案，佢就喺度背，又要次次唔記得句 『Bygones are Bygones』，好煩 :@ 溫完 Cost & Rent，仲剩 Production 同埋 Price-Taking 未溫得熟，今日希望溫完，今晚就溫 Maths & Stats 既 Application of Differentiation 同埋 Binomial。
溫咗個幾鐘，走咗去 IKEA 買餐具。行到一半去嗰間 IKEA 餐廳食飯，我食咗個瑞典牛肉丸，佢就食咩蕃茄海鮮意粉。我買 10 粒裝 $19，佢就買咗 $26，加多個 $7 任斟。瑞典牛肉丸實際成 16 粒，本來諗住食少啲空肚食爆谷，算啦…佢嗰個都幾大碟。
最後行埋自助區就走到去小食部。佢就仲食得落個爆谷，我就幫我家姐買個熱狗。
行落去沙田站坐車返屋企。架東鐵好多人（未到荃灣綫嗰種程度），啲熱狗啲醬又隨地心吸力流晒去個紙袋到，仲要喺個咁迫既環境「葉」，真係好核突。
最後返到屋企。
（因為拎住個熱狗搞到乜相都影唔到 :@）
元旦日，同家姐整野食～
西蘭花芝士洋蔥炒烏冬，仲整咗焗薯，不過無影。喺又一城 TASTE 買咗 $57，包咗支 $9.9 大七喜～
今日就去咗美孚補習，萬事達廣場開始翻新完，舖晒啲白色既雲石地板，不過商舖依然不變。
然之後去大家樂食下午茶，$19…呢個就係佢所謂既西多士…下次都係去返美心食
再去又一城行一陣…而家先知 Starbucks 喺戲院入面，唔怪得唔見。不過去 Pacific 算啦
入筆架山隧道嗰個鐵閘個鎖無咗？
尋日喺九龍仔業主會食早餐。真係好多謝李振昇同佢呀媽，五十幾蚊一個早餐真係食唔起 =.=
九龍仔就成日黎，不過黎黎去去都係牛津道惠康（牛津道、西谷道、慕禮道），同埋小巴 25M 既路線（對衡道、劍橋道）。
為咗實行慳錢大計，由九龍塘行去九龍城補習，行半粒鐘。唔想行窩打老道同界限街吸廢氣，所以入內街。
窩打老道 > 禧福道 > 劍橋道 > 衡州道（九龍仔業主會） > 牛津道 > 火石道（後巷） > 喇沙利道 > 界限街
相比筆架山，我梗係鐘意九龍仔 :$
唔似又一村。又一村係一個谷咁，夏天嗰陣零舍熱、冬天又零舍凍，仲有嗰個區係叫深水埗區。:$
九龍仔咁多條街，總有啲街想住唔想住。唔想住既一定係金巴倫道同律倫街、雅息士道，火車同窩打老道雙重轟炸。
咁多條街我最想就梗係渭州道。渭州道只係劍橋道、牛津道中間。不過聽唔到禧福道、喇沙利道同窩打老道啲噪音，附近又有惠康，行去九龍塘站又近。要坐小巴都有條 25M 喺劍橋道駛過。
當然喇沙利道、牛津道（近學校／惠康）我都接受到既…有得住梗係想住 :$
尋日因為試 DVI 線同寫 essay，電腦又重，最後選擇搭 72X 巴士返屋企。72X 巴士返屋企係最貴，可以最快，亦可以最慢。
等咗六分鐘先有架 72X，不過無乜塞車，5 分幾鐘就到旺角道（以前都要十五分鐘）。不過唔知邊個屎忽鬼加咗個「嘉道理道」呢個站。「嘉道理道」同「中華電力」爭幾遠呀，仲嫌唔夠密咩，因為呢個站都架巴士停咗好耐等入站…
去到九龍塘站，九龍塘站出面條橋本來既黃白色油咗做白色，邊條屎忽鬼做架…以前咪幾好睇…
最後半個鐘返到屋企，同小巴—東鐵—小巴既速度一樣，不過又平又唔洗行斜路（我覺得唔洗轉車無關係的），所以唔洗叫我坐巴士。
部電腦插足晒四條線
而我篇 essay 都完成了…刪咗好多字…
