Bananasims Workshop

寫咗大約兩個鐘，寫好晒全部戶口相關既野。

其實仲有兩篇 History Essay 未寫 ECON 又未溫熟

不過用呢啲時間搞下 freelance…

尋日去完補 UE + 美孚買餸返黎嗰陣，喺窩打老道夾聯合道，睇住歌和老街夾窩打老道嗰啲燈忽然間熄晒

我立即打電話比 1823，然之後五分鐘後就有交警出現，指揮交通。

熄咗既紅綠燈真係別有一番風味～

呢個係我成個暑假做緊既多用戶網誌系統既 freelance 工作。個 theme 咁核突既？其實呢個係我今日完成既佈景主題既配色功能。個系統我設計到只係用一個 template，為免個個網誌都係用同一種配色，我要整個 panel 出黎比人換色換圖，用 CSS 改色，唔係就會非常單調。

講下個 panel 先，呢度係編輯佈景主題既介面。當然除咗呢堆野，仲有好多野可以 set 啦。最上面既「系統佈景主題」係會用返系統既預設風格覆蓋晒所有設定。而簡單講下其他設定，呢啲設定主要分為：字型、顔色、邊框、背景。

字型就得一個設定。為咗保持字型喺部部電腦都睇得到，我喺呢度偷咗並且設定咗一個字型列表。使用者係唔可以自訂字型的。

顔色就用 Color Picker。Color Picker 係一個 jQuery 既 plugin，既易裝又易用，不過隔離個框麻煩少少啦，要搵好多位寫 .change(function() { … });。

至於邊框。邊框本來淨係諗住比人改色，後尾諗諗下諗起有啲人係唔鐘意啲圖有個框框住，所以我又要整個邊框樣式，順便比人 set 個闊度。邊框樣式其實好多種我都未用過，都係喺 W3Schools 到偷返黎。

背景又係必需品黎。背景當然可以 set 色或者圖片。我就好記得 hamu278 講過 Twitter 因為無得 set repeat 搞到唔整，而令我決定一定要整呢個 background-repeat。整 background-repeat 喺 W3Schools 見有 background-attachment 呢樣野所以順便整埋。不過 background-position 實在太難整得易用，所以最後無整。

大家睇下呢啲相

九月之前應該都可以面世。記住幫手試下。

最近轉咗用 Mac，所以我都要搵個新既伺服器軟件同埋編輯軟件去繼續開發網頁。

伺服器軟件 Windows 就有 AppServ 啦，而 Mac 就有一個叫 MAMP 既軟件，同 AppServ 類似，有 Apache、PHP 解譯器、MySQL 資料庫同埋 PHPMyAdmin。

MAMP 大約 130MB 大，解壓後，就咁開個 DMG 再將個程式拉去應用程式資料夾就叫裝完。

MAMP 個介面相比 Windows 既 AppServ 易用好多，有個控制介面比你咁啟動定係關閉伺服器。佢亦都有好多設定，包括 PORT、揀用 PHP 5 定 4 等等，靈活性頗高。如果要將 Mac 當做自置伺服器的話，唔好自己手動裝 PHP MySQL，裝呢個啦。

除咗伺服器軟件，當然有文字編輯軟件。喺 Windows 的話，我既首選係 Macromedia Dreamweaver 8。我特別注明 Macromedia 既原因係 Adobe Dreamweaver CS3 同 CS4 既速度既大細大咗好多，並且極為緩慢。

由於 Macromedia Studio 8 於 Mac OS X 10.5 無法安裝，而我又唔想裝 Adobe Dreamweaver，所以搵咗一個叫 TextMate 既文字編輯軟件。呢個文字編輯軟件有代碼提示、變色甚至驗證功能，並且除 PHP 外更支援 HTML、JavaScript、XML、XSLT、C## 以至 XCode 及 AppleScript 等程式碼，可謂係一個萬能編輯器。

呢個 TextMate 亦都有一個 Project 功能，亦都可以輕易將你既專案，例如一個網站合埋一個方便管理。可惜，我搵到既 TextMate FTP 外掛（Bundle）個個唔係好慢、好陽春就好難用，比 Dreamweaver 既緩慢 FTP 更差。而且佢既代碼提示有時太過懶醒，所以效率都係比 Dreamweaver 略低。

最後就係 FTP。由於 TextMate 無個 FTP 係達到我既要求，所以要額外裝 FTP。以前 Windows 我就喺 Firefox 裝 FireFTP 的，不過而家就裝返啲 standalone 既。我初頭就搵咗個 Classic FTP for Mac，仲細過 1MB，後尾發覺都幾難用，介面同 Mac 整合得好差，最後改用咗而家既 CyberDuck。

CyberDuck 一開出黎就有一個類似書籤頁既介面，咁兩下就可以同指定既伺服器連線，非常方便。另外，呢個 FTP 亦都有好多其他 FTP 無既基本功能，包括同步、檔案權限等等。速度比 Classic FTP for Mac 為快，並且無 Dreamweaver 無故斷線既情況，係 FTP 既首選。

就係呢三個軟件，令我今日成日都係對住部 Mac。

表單測撿的截圖。

I-Circle 會推出網誌服務？唔係，呢個只係我做 freelance 其中一個多用戶網誌系統 project。由於個客尚未提供標誌、討論區名稱，所以我用住 I-Circle 個名。

呢個 project 除咗用黎賺返少少錢幫補外，仲可以叫小試牛刀，學／試寫下一啲 Framework 同埋改善用戶介面新技術。

呢啲新野，表面上既有頭頂導覽列（不過個箭咀我畫得幾核突）、form check（會喺 input 整埋紅色同顯示錯誤資訊）同埋頭頂訊息；內裏既就有新玩既 Smarty 同埋 jQuery。我個人覺得呢幾樣野，對於一個 user-friendly 網站頗為重要。我至憎好似 Discuz! 咁樣填錯野乜都無晒。

整好呢個多用戶網誌系統，就可以考慮係咪同 I-Circle 寫個 CMS 啦，因為 Drupal 喺部份情況下實在太唔方便。