11 月 14 日去咗大西北，遊西鐵、輕鐵同鐵巴，順便陪朋友試下新舖頭。
晨咁早九點就搭觀塘綫同荃灣綫去尖沙咀買電子產品，順便喺嗰半個鐘內遊一遊尖沙咀啲出口，再轉西鐵。
尖東啲出口一早背到熟晒，尖沙咀嗰啲A B C D 喺邊我都唔知 :$ 每個出口行過下咁，A2 出口條扶手電梯個燈箱放得好型。
去南昌買全日通。以前一向美孚買，貪佢個客務中心近，唔洗喺天安門廣場行，仲諗住車費平啲—一直以黎以為九龍塘—美孚既車費平過九龍塘—南昌，事實唔係，美孚 $2.8、南昌 $2.3。南昌同奧運一樣 $2.3，荔景、美孚、柯士甸就收 $2.8，搭多一個站反而平啲 :S 同柴灣去荃灣平過柴灣去旺角東大同小異。
入大西北，又係元朗落。諗住行個弱智 H 出口，不過附近個出閘機食票。個職員同我講話嗰部機個閘壞咗，好多人都出唔到閘。咁又唔封咗部機 =.=…. 去完個 H 出口再行去輕鐵站搭。因為以為最高係最早開出既車，所以上咗 614，點知睇住隔離啲線咁快走，所以先知睇錯野，轉坐第條線。今次遊希望係續個輕鐵站留影，自己都有個深刻印象。
大棠道、康樂路、豐年路、水邊圍四個站去過唔知 N 咁多次，所以第一個站係屏山。落車，過對面月台嗰陣見到有專車，原來就係載住港鐵職員換錢箱。身為九龍人既我當然覺得新奇，不過屯天元人就司空見慣啦。
然之後慢慢坐…塘坊村、洪水橋、鍾屋村、泥圍、藍地，通通影晒。個藍地站真係恐怖，個月台隔離個石地勁多煙頭。過完堆輕鐵站，去到兆康，再搭輕鐵返天水圍轉西鐵去美孚補習。
補完習去錦上路搵朋友，再去荃灣食野。今次食 Wow! Burger，喺荃興徑。喺荃灣西站慢慢行過去食。間舖頭幾細間，不過咁既天氣，環境尚算不俗。我叫芝士豬柳漢堡餐 $28，朋友叫芝士牛肉漢堡餐 $35（餐包野飲同薯條，野飲加大咗）。個包真係幾好食，相比麥記，個份量大少少，價錢又平少少。啲薯條先好食，樣又似電話線，味道類似 KFC 既薯塊，不過仲好食。
食完返大西北。本來諗住去濕地公園，點知都就到閂門時間，所以改去流浮山。去天水圍站坐 K65。初頭行咗去總站，睇下告示先知走咗去屏廈路。等咗差唔多十五分鐘先至有車。架車好迫，沙甸魚，有位坐都好唔舒服。喺流浮山路站站停。沿途唔會見到任何鄉村風光，反而見到既只係一堆貨櫃場。
去到流浮山，本來充滿期望，點知個迴旋處週圍都只係見到爛路、爛車、貨櫃車。呢啲咁既都算人地所講既「美食天堂」？算，行入去大街。所謂既大街其實只係混亂既舖頭中一條小路，迫之餘又無水鄉既感覺，只係覺得行緊街市。出到去，嘩！原來一個廢墟就叫流浮山？出黎只係見到一堆 rotten structure，一係就見到成堆蠔瞉。見到下低仲嘔心，下低條渠又多污水又多垃圾，睇見就作嘔。條渠仲要係流入后海灣，睇你仲敢唔敢食流浮山啲海鮮？去完海邊我對流浮山既海鮮大失信心，朋友仲話食 $12 炸蠔，算啦，食炸重金屬就有份。
嗱嗱臨搵返架 K65 返天水圍站。搭到去天水圍站轉去天恆邨既天影路特快綫 K76。架巴士喺屏廈路出黎等好耐紅綠燈，不過一上天影路，過一陣（我估七分鐘）就到天恆邨，同喺新世紀坐 K5 機場快綫巴士去九龍站一模一樣。
去到天恆又唔想坐輕鐵，所以又坐 K73 去元朗西。條線同 A73 喺天水圍既走線好似差唔多。好快就去到朗屏，再去到大馬路。我係過咗元朗廣場先至到咗元朗西，所以又要喺安寧路到行去康樂路搭輕鐵去元朗。
去到元朗轉西鐵去兆康，出條橋影低速快門。無腳架，都係放喺個石屎欄杆到。影咗好多張得嗰幾張滿意…無腳架係咁 =.=
最後坐西鐵返屋企。途中，喺朗屏有個人訓著覺，而個電話係咁響。朗屏響到去南昌落車都仲響緊…初頭個個人都望住佢，不過去到錦上路荃灣西啲人已經當呢個音樂唔存在，繼續做自己野…
另外，貼下我喺 iPhoto set 咗我影過既地方 :$
Categories: 港鐵, 遊記 Tags: 元朗, 元朗站, 兆康站, 天水圍, 屯門, 流浮山, 港鐵巴士, 荃灣, 西鐵綫, 輕鐵
我都係寫返 2009 年 10 月 10 日既大西北遊記。
話說去美孚 UE 補習，諗住順便去大西北。我等緊小巴嗰陣 Miss Lai 同我講話唔洗去，嗰陣我就改去等樂富中心免費穿梭巴士。
一向筆架山去樂富都係十分鐘，呢次用咗十八分鐘。點解？因為歌和老街、窩打老道至聯合道都極之塞車。淨係喺金城道前面盞燈都等咗好耐…然之後廣播道嗰盞又等…
然之後就搭地鐵去九龍塘轉東西鐵，喺南昌買全日通入大西北。
又係元朗落車，今次去食 andy 介紹既嘉麗園潮洲河粉，喺康景街（近元朗康樂路）。不過去食之前留咗喺元朗站一陣。
大家估唔估到係咩樓梯？呢條樓梯就係傳說中既元朗站 A 出口（朗日路）！估都估唔到呢，元朗站 A 出口既大門行出黎就要轉右行條咁既鐵梯轉五六個圈先黎到地面。我喺地面周圍搵都搵唔到任何既指示經呢條梯上元朗站（全部都係指去輕鐵嗰堆扶手電梯）。個站起到是是正正，出口就起到咁，九鐵好野！
然之後沿朗日路、朗月路行，天橋嗰幾個出口算起得唔錯。想去睇下博愛醫院遠唔遠，因為見到博愛係 H 出口，所以用 J 出口入返元朗站。行過對面 H 出口，見到個個預留位部牆，轉左行樓梯。行行下，嘩！又要轉十幾萬個圈，燈光昏暗，落到去只係覺得好似入咗人地後花園。不如封咗佢當緊急通道，叫人行 J 出口啦。用 H 出口最後咪又係行返同 J 出口一樣嗰條路。
去完就搭輕鐵。嗰個左右調轉咗既 EXIT 仲未換。搭輕鐵 761P 去到康樂路站，就行去食。間野幾凍下，我叫咗魚皮餃麵，好大澗水味，無 andy 講咁好食。不過後尾 andy 同我講間野河粉先好食。食咗廿四蚊又要無野飲，有啲失望。
食完未諗到做乜好，所以行元朗市中心：康樂路、教育路、大棠路，然之後喺大棠道搭輕鐵返元朗站轉西鐵去朗屏站轉巴士。喺朗屏站搵咗好耐先搵到個巴士站，等咗十五分鐘等 K66（十分鐘有架 K68）。andy 之前講過上上層睇風景好，所以我上上層（應該都係我成世第三、四次上上層，因為我嫌上層麻煩）。架車行體育路…教育路…去到大棠路，因為壞車搞到大塞車…最後用咗十幾分鐘去到大棠。（架車要倒車入站 =.=）
原來 expect 係一個好靚既地方，點知得條臭渠，仲有好多垃圾。香港啲人真係唔識珍惜郊野，香港啲郊野好多垃圾，一係就舊到無人有，完全比唔到人一種靚既感覺…無理由淨係留喺總站，所以沿住僑興路行，見到大棠山道…等等，去到大棠迴旋處見到有另外一架 K66，我先去大棠迴旋處個巴士站等車。等咗一陣架車到，沿返大棠路上元朗。
去到體育路，我落車，因為體育路嗰邊比到我一種好新市鎮既感覺。行咗一陣，見到有架 K68 去元朗公園既巴士，立即走去巴士站坐。喺元朗公園 dull 個圈返體育路。坐坐下見到有個好靚既日落，所以我喺水邊圍落車轉輕鐵上鳳翔路天橋。上到去，個太陽唔係對到正大馬路，有啲可惜。
A73 最後一日正常服務，所以去元朗輕鐵總站客務中心問佢有無車，再去坐 761P 去到天富站。一落車就見到架 A73 走咗，所以又喺天秀路、天瑞路天橋周圍行，搵 A73 既巴士總站。搵極都搵唔到，最後喺天秀路見到 A73 渣緊黎，上車。
一上車見到幾個巴士迷。我坐喺最後。班巴士迷喺度搔擾司機渣車，渣渣下無啦啦伸部相機埋去胎盤，因間又大聲叫，乞人憎。A73 好鬼慢，因為停站多。喺天富出發坐輕鐵 + 西鐵一定快過佢，不過佢勝在服務到好多無輕鐵服務既地區。A73 上朗天路好快，班巴士迷話「80 公里！」。過咗一陣去到富泰，班巴迷落晒車。然之後架車又要慢速喺青山公路駕駛…好想訓…最後終於捱到去屯門碼頭總站，成粒鐘，咁就坐完 A73。
最後坐 507 轉西鐵返屋企。
後日去流浮山先。
Categories: 港鐵, 遊記 Tags: 元朗, 元朗站, 大棠, 天富站, 天水圍, 西鐵綫, 輕鐵 507, 輕鐵 761P, 鐵巴 A73, 鐵巴 K66, 鐵巴 K68
12 月 23 日，我去咗遊荃元屯，即係荃灣、元朗同埋屯門。我嗰陣係用西鐵綫全日通的，遊歷包括荃灣西、錦上路、元朗、屯門及輕鐵。
我之前喺 OpenRice 嗰度搵到間叫嘉樂冰廳既餐廳，心郁郁想去食下，所以今次特登去，順便遊下荃灣西。依舊，搭到去九龍塘行去又一城巴士總站再搭 12A 去南昌站。買全日通，再搭去荃灣西。途中有個大陸既交流團，嘈到喊，未到荃灣西最後都悶到訓覺…
去到荃灣西落車，攞車站指南，然後搵出口。搵出口真係好煩，有時去錯另一邊…好彩買咗全日通，又入閘又出閘，正！最後搵到個大河道個大出口，行出去，已經 見到我最鐘意既如心廣場。行過荃灣公園，慢慢行，再經過條公園大街，就到楊屋道。荃灣變化好大，荃新天地、如心廣場本來以前舊樓既地方重建晒。本來做巴士 總站既荃灣停車場大樓又廢棄咁掣…
過咗楊屋道，入咗新村街，慢慢搵，開頭入咗間無咁多好評既蘭香快餐店，睇睇下唔對路就出返黎嘉樂冰廳。間野細到嘔泡，啲椅又細。個老闆娘唔係太有禮貌，都唔叫太無禮貌。不過啲伙記就狂喝人，乞人憎。
搵到個位坐，同人搭枱，叫咗個雲吞撈麵，$24，無野飲。等咗成十幾分鐘先有野食，不過 O 晒，成八嚿雲吞，之後又大碟。食落真係幾好食，名不虛傳。食咗半個鐘收錢，點知收成 $28，收服務費，玩野咩…唉算，唔理佢，走佬。因為我攞住張全日通，佢似乎知我係去西鐵站，所以叫我行後巷條路，快啲。點知又窄又有啲工人洗碗洗雞翼， 最後先走得甩。
返返去楊屋道，沿住大河道返西鐵站。荃灣都去過唔少次，所以無乜特別需要我遊（嗰陣都兩點鐘，如果仲留喺荃灣西，買全日通個機會成本會好大）。
搭車去到錦上路，錦上路站一向都幾鐘意，不過一直都係大白象站，月台極其量都係得 30 人。去到錦上路當然大肆影相，出閘喺廣場影咗張全景圖（無腳架，好差），之後又影港鐵錦田大樓。錦田大樓個九鐵標誌都拆咗了…幾時加港鐵標誌呢？仲有影到張不倫不類既 poster…留咗喺錦上路大約半個鐘，去元朗。
搭咗三分鐘去到元朗。我唔多鐘意西鐵啲站，太過大…落咗去輕鐵元朗站，標準輕鐵月台，又暗又樣衰。我想搭去屯門站。行入去，見到寫住 615 線，立即轉右，點知個 PIDS 又寫住 751 友愛，呢個時間我知行錯月台。然後搵呀搵，睇邊個快啲開出，最後搭咗 615。
上到去架車無人，又係轉個大圈，開始錄片。架車去到大棠道之後成班人上車…恐怖…過到去唔知豐年路定咩路，有個呀婆抱住一個 BB，個 BB 就狂喊，唔錄片啦，讓個位比佢坐。架車勁迫，又多柱男柱女挨喺條柱到唔比人用，爭啲跌親。唔知係咪個個屯天元人係輕鐵先鋒定係個呀婆勁，我問佢去邊個站搭 乜野線佢都可以答得勁快…個呀婆問我去邊，我話屯門站，佢諗都唔諗就話我搭錯…因為嗰陣已經去到青松，所以要去田景轉車。
我唔係屯天元人，唔熟輕鐵，所以喺田景轉車竟然跑去第個月台轉…點知原來留喺度都轉到車…上咗車之後，一如既往坐車頭，竟然聽到司機位入面有「列車正在進 入月台，請停低上落客」既男人聲…呆下呆下終於呆到去河田站。印象中河田站同屯門站好近，所以喺度落車，因為未喺度落過車，多數喺屯門落。
落咗車又慢慢上西鐵返九龍。去到南昌搭 K16 去尖東再返屋企。除非去奧運、九龍西、尖沙咀同尖東，千祈唔好搭 K16，搭南昌架 12A 啦，20 分鐘直達九龍塘，好過架 K16 半粒鐘先去到尖東…
